VOV4.Xơ Đăng - Hâi lơ 19/5, tung lâp tơnêi têa po hên mâu tơdroăng cheăng koh tơbâ 132 hơnăm Hâi kot mâ Pôa Hồ Chí Minh, Kăn xiâm hnê ngăn tơnêi têa hneăng hdrối. Hdrối mê, a măng tĭng hdrối, a Hà Nội hiăng po hneăng Tơpui tơno khoa hok tơnêi têa, mơđah tơbleăng um ƀă hlá mơ-eá ‘’Thăm mơdêk hiâm mơno kăch măng, xut tah lôi troăng hơlâ phá krê xêh, hriâm ƀối tiô troăng tơdjâ, hiâm mơno Hồ Chí Minh’’. Pôa Võ Văn Thưởng, Ngế cheăng tung khu xiâm Kal kí, Ngế ki cheăng má môi dêi Khu pơkuâ hnê ngăn veăng tơpui tơno ƀă ai pơkuâ ngăn roh tơpui tơno kố. Ing mê, veăng kum rak tơniăn tro khât tâ nếo ki kơnía git dêi hoa hok, ki ai păng ‘nâng dêi hiâm mơno Hồ Chí Minh ‘na thăm mơdêk hiâm tuăn kăch măng, xut tah lôi tơdroăng krê phá xêh.

Dế ối rêh nah, Pôa Hồ Chí Minh, ngế ki mơjiâng ƀă hriâm pât Đảng pin, đi đo kum tơdroăng ki tơmâng ngăn khât troh hnoăng cheăng mơjiâng Đảng, vâ Đảng pin châ krúa khât, tơdrăng, rơdêi, cho môi Đảng kăch măng tơdrăng lĕm, cho hiâm mơno lĕm, rơkê. Drêng tơbâ 39 hơnăm hâi mơjiâng Đảng (03/02/1969), Pôa hiăng chêh ƀai ‘Mơdêk khât hiâm mơno lĕm kăch măng, xut tah tâi troăng tơmiât phá krê ôh tá tro”, tối nhên hnoăng cheăng pơkuâ dêi Đảng ƀă kăch măng Việt Nam ƀă tơdroăng ki kal athế mơdêk hiâm mơno kăch măng ƀă kăn ƀô̆, đảng viên tối tơdjuôm, mâu rơxông hơnăm ối nếo tối krê.

Tơdrêng amê hlối, mơhno tối mâu tơdroăng ki hlo, ki ‘mêi dêi troăng tơmiât krê ƀă mơdêk mâu troăng hơlâ hbrâ mơdât troăng tơmiât phá krê ƀă hên ki ê. Lối tơdế chal klêi kơ’nâi châ mơjiâng, troh nôkố ƀai chêh kố xuân ối lĕm môi tiah tơdroăng ki kơnía ƀă hnoăng mơjiâng, ‘mâi rơnêu Đảng, ƀă rêm ngế kăn ƀô̆, đảng viên athế đi đo ‘mâi rơnêu hriâm pât, khŏm mơ-eăm hbrâ mơdât ƀă tơplâ xut tah troăng prôk ki tơmiât phá krê ôh tá tro vâ mơdêk hiâm mơno lĕm kăch măng.

Tâ tá rôh hôp khoa hok tơnêi têa

Tiô Yăo sư, Tiê̆n sih Hoàng Chí Bảo, chuyên gia câp cao Học viện Chính trị Quốc gia Hồ Chí Minh, tung ƀai “Mơdêk khât hiâm mơno lĕm troăng tơmiât krê”, Pôa tơkŭm ki hên cho ‘na tơdroăng ki hdreăm hôu Khu tơmiât prôk troăng krê, pro ôh tá tro, Pôa mơhno nhên: “Xâ mot plâ- xâ ối tung hiâm mơno gá ối rơ-iô luâ tâ xâ kong têa ê mot plâ” – Kố cho mâu tơdroăng ki tối tơbleăng kơtăng ăm pin tung ‘mâi rơnêu, hriâm pât hiâm mơno tung plâ rơxông.

“Pôa hdreăm hôu tá mâu ngế ki ai hiâm mơno ôh tá tơdrăng, tơkéa vâ tối pêi pro bú môi iâ hnoăng cheăng mê hiăng riân tối dêi hnoăng ƀă Đảng, hiăng pâ thế Đảng athế ngăn nhuô̆m môi tiah lâi? Pôa chêh tối rơhí rơhó, kơtăng khât, ai mâu ngế ki ‘nâ ai hiâm mơno tiô troăng tơmiât prôk krê xêh, mê pro Đảng chiâng môi to kông mơgăn vâ xoi troh tơdroăng ki pêi pro ôh tá tro. Mâu ngế ki ai hiâm mơno tơmiât krê ‘na tuăn tơmiât ki phá krê, tơdroăng ki kân ôh tá pêi, tơdroăng kŭn mê pêi, hriâm tâp mê vâi klâi, tơdroăng cheăng hrá pêi pro, tui lui cho pro xôi hnoăng cheăng dêi khu tơrŭm pơxâu phâk ki Đảng hiăng pơkâ, ƀă tro pro xôi, chiâng tơtrâ Đảng. Mâu tơdroăng ki tơmiât nhên tơpui leăng môi tiah mê, gá trâu hngế khât tung tơdế chal hdrối nah – cho môi tơdroăng ki tối tơbleăng kơtăng ăm pin tung ‘mâi rơnêu, hriâm pât hiâm mơno tung plâ rơxông”.

Poê ché pơxiâm po mơđah tơbleăng um

Mâu tơdroăng ki veăng tơpui a rôh hôp hiăng pro nhên ‘na tíu cheăng troăng tơdjâ, hiâm mơno, túa rêh, túa cheăng Hồ Chí Minh tung hiâm mơno dêi Pôa ‘na mâu tơdroăng ki xiâm dêi kăch măng Việt Nam; hnoăng cheăng, ivá hiâm mơno ngế kơnốu dêi hiâm mơno tơmiât, hơniâm mơno Hồ Chí Minh ƀă hnoăng cheăng mơjiâng Đảng tối tơdjuôm ƀă hnoăng cheăng mơjiâng Đảng ‘na hiâm mơno tối krê sap ing hdrối nah troh nôkố ƀă tá chal nếo; tơrŭm pơla hiâm mơno tơmiât, túa rêh ối, pêi cheăng Hồ Chí Minh; tơpui leăng nhên tơdroăng ki tơrŭm tơdjâk pơla hiâm mơno ki pơxúa ƀă hiâm mơno túa rêh ối vâ rak vế ivá ăm mơnhông rế tơtrâ troăng tơmiât pêi pro phá krê ƀă hên ki ê.

Pôa Huỳnh Tấn Việt, kăn pơkuâ ngăn Đảng ủy Khô̆i mâu kơ koan Tơnêi têa ăm ‘nâi, Rôh hôp kố hiăng veăng kum mơdêk ki hlê plĕng ƀă pêi pro trâu hngế tâ ki pơxúa, ki kơnía kal dêi hiâm mơno tơmiât, troăng tơdjâ, hiâm mơno, túa rêh ối Hồ Chí Minh ƀă hnoăng cheăng mơjiâng ƀă ‘mâi rơnêu Đảng. Tơdrêng amê hlối cho rôh vâ hơ’muăn tối ƀă hlê nhên trâu hngế tâ mâu rơkong hnê dêi Hồ Chí Minh, vâ mâu kăn ƀô̆, đảng viên hvái ngăn dêi tơná, vâ mơdêk mâu tơdroăng ki hiăng chiâng pêi pro, ‘mâi rơnêu mâu tơdroăng pêi pro ối ‘ro, mơ-eăm tơxâng cho ivá rak ngăn kuăn pơlê môi tiah Hồ Chí Minh ki hiăng hnê pơchân.

Pôa Huỳnh Tấn Việt tối tiah kố, pơkâ thế mơ’no tung nôkố cho rêm ngế kăn ƀô̆, đảng viên kal kơtăng pêi pro, pôu râng hnoăng cheăng djâ troăng ahdrối; ngế ki ai hnoăng cheăng rế kân, ai tíu cheăng kân, malối cho cho ngế ki pơkuâ mâu kơ koan, tíu pêi cheăng tung Đảng ƀă tung kơ koan pơkuâ rế athế djâ troăng ahdrối tung ‘mâi rơnêu, hriâm pât hiâm mơno lĕm, túa rêh ối, túa pêi cheăng, troăng pêi cheăng vâ kuăn pơlê tiô ƀối:

“Mot tung hiâm mơno rơkong hnê dêi Pôa, pin kal khŏm mơ-eăm, rak vế ƀă kơhnâ pêi pro krúa mâu ngế cheăng tung Đảng, hbrâ mơdât ƀă xut tah mâu ngế ki kâ kơluâ, tơdroăng ki pro hơ’lêh ‘na hiâm mơno tơmiât kal kí, túa rêh ối dêi kăn ƀô̆, đảng viên, tơdroăng “ki pro hơ’lêh”, “hơ’lêh krê xêh” tung khu pơkuâ; Pơtối ăm tơdroăng ki hriâm tâp ƀă pêi pro tiô hiâm mơno, túa rêh ối Hồ Chí Minh chiâng tơdroăng cheăng pêi ki đi đo, chiâng môi tơdroăng ki rơhêng vâ ‘na mơhno túa lĕm tro tung Đảng”.

Tơpui hnê mơhno a Rôh hôp, pôa Võ Văn Thưởng, ngế cheăng tung Khu xiâm pơkuâ tơdroăng kal kí, kăn pơkuâ ngăn Đảng tối nhên: Ki xiâm dêi mơjiâng Đảng ‘na hiâm mơno cho pêi pro hiâm mơno kăch măng, tơpui athế tơtro ƀă tơdroăng pêi, pêi pro môi khu pơkuâ tơdroăng kal kí krúa lĕm. Troăng tơmiât phá krê xêh cho “ngế ki ‘mêi ối tung hiâm mơno” tâng vâ tơtrâ mê athế pơxiâm mơjiâng, tung mê hnoăng cheăng pơkâ ‘mâi rơnêu, hriâm pât, hbrâ mơdât tơdroăng ki rơhêng vâ, mơdêk ivá mơdât ‘na mâu tơdroăng ki pơlông djâ ƀă hên ki ê.

Pôa Võ Văn Thưởng pơkâ thế mâu kơ koan, tíu pêi cheăng kal mơdêk tơdrăng ki pơxâu phak tung Đảng, mơdêk hnoăng cheăng séa ngăn, pêi pro tơtro ƀă hơ’lêh nếo túa pơkuâ ƀă hên ki ê; mơdêk pơxâu, vâ châ hlo mâu ngế ki pêi pro tơdroăng ôh tá tro, pơxâu phak kơtăng mâu ngế pro xôi, hnê tối, pro ăm tơleăng hiâm mơno, ai tơdjâk tŏng kum ăm hnoăng cheăng hnê hriâm hiâm mơno kăch măng, mơdêk hnê khĕn ƀă hnê khĕn xêh.

VOV 1 

Katarina Nga tơplôu ƀă tơbleăng