Mơgêi 10 hơnăm pêi pro Pơkâ kơxô̆ 29 ‘na pơ’lêh nếo ki xiâm, tâi tâng hnê hriâm, hnê mơjiâng tuăn ngôa rơkê
Thứ sáu, 08:29, 15/12/2023
Tơplôu: A Sa Ly/VOV
Tơplôu: A Sa Ly/VOV
VOV4.Xơ Đăng - Kơxo lơ 14/12, Khu xiâm pơkuâ hnê hriâm ƀă Hnê mơjiâng tuăn ngôa rơkê tơkŭm po Hneăng hôp mơgêi 10 hơnăm pêi pro pơkâ kơxô̆ 29 hơnăm 2013 dêi Khu xiâm pơkuâ Đảng hneăng má 11 ‘na ‘’Pơ’lêh nếo ki xiâm, tâi tâng hnê hriâm ƀă hnê mơjiâng tuăn ngôa rơkê, tơxâng pơkâ kơmăi kơmok, tiô rơxông nếo tung tơdroăng cheăng kâ kơchơ mơdró mơnhên la ngiâ tiô troăng xah hô̆i chuh ngiah ƀă mot tơrŭm lâp plâi tơnêi’’.
Xông tơpui mơgêi a hneăng hôp, Ngế xiâm pơkuâ hnê hriâm ƀă Hnê mơjiâng tuăn ngôa rơkê Nguyễn Kim Sơn mơnhên, mâu tơdroăng châ tơƀrê hiăng châ klêi kơ’nâi 10 hơnăm pêi pro Pơkâ 29 ăm hlo tơdroăng mơ-eăm kân dêi mâu Khu cheăng, Khu xiâm, kơvâ cheăng Tơnêi têa ƀă mâu kong pơlê.
Hneăng hôp mơgêi tơkŭm po tung pơla ai hên tơdroăng xiâm xuân dế pêi pro, hên tơdroăng xiâm tá hâi kêi đeăng. Xua mê Khu xiâm pơkuâ hnê hriâm ƀă Hnê mơjiâng tuăn ngôa rơkê pơkâ Khu xiâm kal kí tơbleăng mơgêi dêi Khu xiâm kal kí ‘na tơdroăng pơtối pêi pro Pơkâ 29 vâ pơtối pơ’lêh nếo ki xiâm, tâi tâng ƀă mơdêk ki dâi lĕm hnê hriâm, hnê mơjiâng tuăn ngôa rơkê tơxâng tiô pơkâ, hnoăng cheăng tung hneăng nếo dêi tơnêi têa.
Viết bình luận