Pơtối hôp rôh má 29, hâi lơ 9/1, Vi ƀan pơkuâ cheăng Kuô̆k hô̆i hiăng ăm hnê tối tơdroăng tơmâng xo, ‘mâi rơnêi 2 tơdroăng Luât ki kal klêi mê mơgêi hneăng hôp. Mê cho Luât tơnêi (‘mâi hơ’lêh) ƀă tơdroăng hlá mơ-éa Luât mung liăn ki (‘mâi hơ’lêh). Tơdroăng hbrâ Luât tơnêi (‘mâi hơ’lêh) klêi mê châ tơmâng, ‘mâi rơnêu 16 chương ƀă 206 Tơdroăng.

Pơchông ƀă tơdroăng chêh ‘na luât pơtroh ăm Vi ƀan pơkuâ Kuô̆k hô̆i a hneăng hôp pơka péa rôh dêi roh hôp má 6, tơdroăng chêh ‘na Luât hiăng tâk 5 tơdroăng, pê klêi, ‘mâi rơnêu 250 tơdroăng. Mơgêi hneăng hôp roh má 29, Kăn xiâm hnê ngăn Kuô̆k hô̆i Vương Đình Huệ pơkâ thế mâu Vi ƀan dêi Kuô̆k hô̆i mâu kơ koan tơrŭm cheăng pơtối mơđah chôu tơmâng, ‘mâi rơnêu tơdroăng cheăng ‘na Luât tơnêi (‘mâi hơlêh); tơdroăng cheăng Luât Mâu khu ăm mung liăn (‘mâi hơ’lêh); Tơdroăng chêh Pơkâ ‘na mâu luât pơkâ pêi pro, luât tŏng kum ki krê vâ tah ki xơpá, tơvâ tơvân, mơdêk rĕng pêi mâu Tơdroăng pơkâ dêi Tơnêi têa ƀă mâu tơdroăng ki kal ê nếo vâ hbrâ ăm rôh hôp ôh tá xê tiah hmâ rôh má 5, Kuô̆k hô̆i hneăng 15, pơxiâm po a hâi lơ 15/1 la ngiâ.