Tối tơbleăng mơgêi Hneăng hôp, pôa Vương Đình Huệ, Kăn xiâm hnê ngăn Kuô̆k hô̆i ăm ‘nâi, Hneăng hôp hiăng ai 7 tơdroăng tối tơbleăng dêi mâu ngế pơchuât a rôh hôp tâi tâng ƀă 2 rôh hôp chuyên đề, lối 40 ƀai chêh dêi mâu khu tơrŭm cheăng, mâu ngế rơkê, khu cheăng khoa hok.

A rôh hôp chuyên đề ƀă hneăng hôp tâi tâng xuân môi tiah tơpui tơno to râ kăn xiâm hiăng ai lối 40 tơdroăng veăng hnê tối dêi mâu ngế rơkê, mâu ngế cheăng khoa hok, mâu khu mơdró ƀă mâu kăn teăng mâ tung tơnêi têa ƀă kong têa ê veăng tơpui tơno ƀă dêi rơpó. Hneăng hôp hiăng tối rơkong tơpui dêi khu mơdró ing kăn teăng mâ Liên đoân ngăn Tê mơdró ƀă Kơmăi kơmok Việt Nam (VCCI), dêi mâu khu, dêi mâu khu mơdró veăng tơpui tơdrêng a hneăng hôp; tơdroăng tơpui dêi mâu ngế rơkê tung tơnêi têa ƀă kong têa ê, mâu ngế rơkê, mâu ngế hriăn plĕng tơdroăng ki nếo, mâu ngế pơkâ ‘na tŏng kum ƀă kơ koan pêi pro tro tiô luât pơkâ xuân môi tiah mâu ngế ki xúa luât pơkâ tŏng kum.

Hneăng hôp hiăng chiâng môi tíu xiâm tơpui tơno hên tơdroăng. Mâu kăn tơpui hên troh tơdroăng mơ-eăm pêi ing tơdroăng pơxúa khât ‘na mơnhông mơdêk ngiât ƀă tối kố cho troăng rơhlâ ki xiâm pêi pro, pơkâ, luât tŏng kum vâ mơdêk kâi tơbriât cheăng ƀă mơnhông cheăng kâ krá tơniăn.