Kơxo lơ 17/10, Vi ƀan pơkuâ Kuô̆k hô̆i ăm rơkong veăng tơpui tung hlá mơ-éa pơchuât tơbleăng hbrâ ăm Hneăng hôp má 6, Kuô̆k hô̆i hneăng 15. Pôa Bùi Văn Cường, Ngế xiâm chêh tôm xo rơkong Kuô̆k hô̆i, Kăn pơkuâ Ƀơrô cheăng Kuô̆k hô̆i ăm ‘nâi, tiô tối hdrối tâi tâng hâi pêi cheăng dêi Kuô̆k hô̆i cho 22 hâi; pơxiâm po a hâi lơ 23/10 ƀă tiô tối hdrối kô mơgêi a kơxô hâi lơ 29/11.

Kuô̆k hô̆i kô hôp tơkŭm a Hngêi hôp Kuô̆k hô̆i ƀă pêi pro tiô 2 rôh. Mơgêi Rôh hôp 27, pôa Vương Đình Huệ, Kăn xiâm hnê ngăn Kuô̆k hô̆i tối nhên, troh nôkố mâu hnoăng cheăng hbrâ rơnáu ăm Hneăng hôp má 6 hiăng klêi, hbrâ rơnáu ăm Hneăng hôp má 6. Pôa Vương Đình Huệ, Kăn xiâm hnê ngăn Kuô̆k hô̆i pơkâ thế mâu kơ koan tơrŭm cheăng rĕng chêh bro klêi mâu hlá mơ-éa mâu tơdroăng ki kal dêi Hneăng hôp vâ pơtroh ăm mâu kăn Kuô̆k hô̆i.

Tơdrêng amê hlối hbrâ tŭm, krâu mâu tơdroăng ki vâ rak tơniăn, tung mê tơtrŏng troh hnoăng cheăng tơbleăng tơdroăng kal ing um tơvi, rơ’jíu, mâu tơdroăng ‘na kơƀăng tăng, tơdroăng gâk kring, tơniăn vâ kum tro má môi ăm Hneăng hôp la ngiâ.