VOV4.Xơ Đăng - Klêi kơ’nâi 1 hâi tơdế pêi cheăng thâ, kơtăng, pôu râng hnoăng cheăng, hâi lơ 12/7, Roh hôp má 13 dêi Vi ƀan pơkuâ Kuô̆k hô̆i hneăng má 15 hiăng mơgêi. Xông tơpui mơgêi roh hôp, pôa Vương Đình Huệ, Kăn xiâm hnê ngăn Kuô̆k hô̆i mơnhên, mâu tơdroăng xiâm châ séa ngăn nhên, châ vâ môi tuăn ƀă hên ngế vâ môi tuăn. A roh hôp kố, Vi ƀan pơkuâ Kuô̆k hô̆i hiăng séa ngăn, pơkâ troăng hơlâ pơ’lêh xiâm kối xúa kong, tơnêi kong ƀă tơnêi pêt báu ing péa rơnó tơngi klêng dêi Tơdroăng tơkêa bro mơjiâng troăng kân ăm phêp rơxế kơtâu têi Peăng kơnhŏng – Pá hdroh peăng mâ hâi lo hneăng hơnăm 2021 – 2025 ƀă hên tơdroăng kal ki ê.

‘Na hbrâ Hneăng hôp má 4, Kuô̆k hô̆i hneăng má XV, pôa Bùi Văn Cường, Kăn xiâm chêh tôm xo rơkong Kuô̆k hô̆i, pơkuâ Ƀơrô Kuô̆k hô̆i tối ăm ‘nâi, tiô tối hdrối Hneăng hôp má 4, Kuô̆k hô̆i hneăng má XV kô pơxiâm po a hâi lơ 20/10/2022 ƀă tiô tối hdrối kô mơgêi a hâi lơ 18/11/2022.

A Sa Ly tơplôu ƀă tơbleăng