VOV4.Xơ Đăng - A Hà Nội, Tiêuh ƀan gâk kring, Khu tơkŭm po Hneăng tơ’noăng ivá Đông Nam Á roh má 31 (SEA Games 31) ƀă Tiêuh ƀan Gâk kring, tơniăn SEA Games 31 Khu xiâm pơkuâ Kŏng an tơkŭm po roh hôp mơgêi tơdroăng vâ mơnhên tơdroăng châ tơƀrê tung tơdroăng gâk kring, tơniăn SEA Games 31. Pêi pro pơkâ tơniăn gâk kring SEA Games 31, Khu xiâm pơkuâ Kŏng an hiăng tơbleăng hên pơkâ pêi ‘na tơniăn gâk kring, tơniăn hneăng hôp; mơjiâng Tiêuh ƀan gâk kring tơniăn SEA Games 31; pêi pro hên troăng pêi, roh hôp tơniăn gâk kring leh pơxiâm po, mơgêi ƀă mâu roh Mơgêi kơtú ƀalong mơngế kơnốu, kơdrâi; tơkŭm po séa ngăn, ti tăng séa ngăn tơdroăng rak tơniăn gâk kring a 6 kong pơlê ki ai hnoăng kal.

A roh hôp, pôa Lương Tam Quang, Ngế xiâm phŏ pơkuâ Kŏng an pơkâ thế mâu khu xiâm, kơvâ cheăng, kong pơlê pơtối tơmâng, môi tuăn, pro tơ’lêi hlâu, tơrŭm krá tơniăn ƀă Khu xiâm pơkuâ Kŏng an tung tơdroăng tơniăn gâk kring, tơdroăng rak tơniăn tối tơdjuôm, tơniăn gâk kring, tơdroăng rak ngăn mâu tơdroăng kal kí, mơhno khôi túa lĕm tro ki kal dêi tơnêi têa tối krê; tơmâng mơjiâng khu Kŏng an kuăn pơlê thế krúa lĕm, ó rơdêi, ki rơkê păng ‘nâng, ƀeăn ƀĕng rơkê, tiô rơxông nếo, tơxâng tiô tơdroăng pơkâ hnoăng cheăng tung rơxông nếo.

A Sa Ly tơplôu ƀă tơbleăng