VOV4.Xơ đăng - Kơ’nâi 6 hâi pêi cheăng, kơxê lơ 10/5, Hneăng hôp roh má 5 Khu xiâm Đảng hneăng 13 hiăng mơgêi. Môi tung mâu tơdroăng châ pôa Nguyễn Phú Trọng, kăn xiâm pơkuâ hnê ngăn Đảng tối pơchân tung ƀai tơbleăng a rôh mơgêi mê cho kal khât thế pro ăm pơ’lêh rơdêi ƀă tro khât tâ nếo tung mơdêk ivá pơkuâ, ivá tơplâ dêi khu tơrŭm cheăng Đảng; ƀă vâ pê klêi pơkâ, tiô tơdroăng pâ thế ƀă mâu troăng rơhlâ pơkâ.

Pôa Nguyễn Phú Trọng, Kăn xiâm pơkuâ hnê ngăn Đảng tơpui mơgêi a hneăng hôp

Pôa Nguyễn Phú Trọng pơkâ thế, khu tơrŭm cheăng tíu xiâm ƀă mâu khu râ Đảng, mâu kơ koan tí tăng ‘nâi plĕng, kum tơdroăng a Tíu xiâm kal rĕng ai troăng rơhlâ tơkŭm pêi; mâu kong pơlê, khu kăn Đảng kong pơlê, mâu Đảng bô̆ xiâm tơnêi têa thế kơhnâ rơkê ƀeăn, hbrâ nhên mâu troăng rơhlâ, pơkâ, tơdroăng cheăng ƀă troăng rơhlâ pêi ki Pơkâ dêi Tơnêi têa hiăng tơbleăng.

A hneăng hôp, Khu kăn xiâm tơnêi têa hiăng môi tuăn troăng rơhlâ mơjiâng khu hnê mơhno râ kong pơlê ‘na hbrâ mơdât kâ kơluâ, mơdât pro tơdroăng ôh tá tro.

Gương tơplôu ƀă tơbleăng