Cho kong pơlê ki xơpá, krâm hdroâng kuăn ngo, sap hơnăm 1994, drêng kong pơlê Kon Tum châ mơjiâng klâ ing kong pơlê Gia Lai - Kon Tum, tung pơla la dế ai hên tơdroăng xơpá, Khu kăn Đảng kong pơlê Kon Tum ai Pơkâ kơxô̆ 10, pơtối mê cho Pơkâ 01 hơnăm 1996, Pơkâ 04 hơnăm 2007 ƀă troăng rơhlâ pơkâ pơla mê cho mâu kơ koan, tíu pêi cheăng tơrŭm pro nhŏng o mơjiâng cheăm kơpong hdroâng kuăn ngo, kơpong pơxiâm pêi cheăng a tíu ki nếo xơpá ó má môi.

Pôa Ka Ba Tơ, cho Kăn phŏ hnê ngăn Đảng kong pơlê, Kăn hnê ngăn Hô̆i đong kong pơlê Kon Tum ăm ‘nâi:

“’Sap ai Pơkâ 10 troh Pơkâ 01, Pơkâ 04 ai pơxúa ƀă kal khât. Pơkâ pêi pro ăm kăn ƀô̆, đảng viên ƀă kuăn pơlê tơkŭm mơnhông cheăng kâ - rêh ối  rơdêi ƀă krá tơniăn ton. Má péa nếo, cho mơjiâng Đảng krá rơdêi pro xiâm, xuân môi tiah hnoăng cheăng pêi djâ troăng a hdrối dêi kăn ƀô̆ đảng viên vâ chông djâ kuăn pơlê pêi pro tro mâu Pơkâ dêi Đảng, Tơnêi têa’’.

Pêi pro mâu tơdroăng Hnê mơhno, Pơkâ hnê pêi a cheăm bêng, pêi a kơpong hdroâng kuăn ngo ki kơtiê xơpá ó khu kăn Đảng kong pơlê Kon Tum, tung mâu hơnăm hdrối mê hía nah hiăng ai chât rơpâu hdrôh ngế kăn ƀô̆ đảng viên rêm râ dêi kong pơlê tơmâng hnê pêi khăm a thôn, pơlê ‘’Rơtế kâ, rơtế ối, rơtế pêi’’, tơmâng tơdroăng kuăn pơlê tối, púi vâ, tơleăng mơnhên mâu tơdroăng pâ thế ƀă tơdroăng púi vâ dêi kuăn pơlê.

Râ ủy, đảng viên pêi mâu tơdroăng cheăng a pơlê cheăm bêng, kơpong hdroâng kuăn ngo ki kơtiê xơpá vâ tơmâng hnê kuăn pơlê mơnhông cheăng kâ - rêh ối, ‘mâi hơ’lêh tơdroăng rêh ối ăm kuăn pơlê. Pôa Dương Văn Trang, Ngế cheăng tung tíu xiâm Đảng, Kăn hnê ngăn Đảng kong pơlê, Kăn hnê ngăn Hô̆i đong kong pơlê Kon Tum tối:

“Hiăng cho Kăn ƀô̆ đảng viên veăng kơjo kum rơpŏng kơtiê, rơpŏng vâ chê kơtiê mâu hdroâng kuăn ngo rah xo túa cheăng, túa pêi cheăng kâ vâ mơnhông mơdêk hluăn kơtiê cho lăm troh a klâng, a chiâk deăng, troh a kơdrum ƀă pêi pro tiô troăng rơhlâ “hnê hên hdroh kô chôu pâ” ƀă “kŏng pêi rơkong hlối hnê” tơbâ hnê tối ăm hdroâng kuăn ngo thế ái tuăn kơdôu mơ-eăm tung pêi cheăng vâ kâi hluăn kơtiê.

Kố cho môi tung mâu tơdroăng ki kal khât dêi rêm kăn ƀô̆, đảng viên a cheăm pơlê ƀă tung kơpong pơlê ai krâm hdroâng kuăn ngo rêh ối”.

Ƀă troăng rơhlâ tối vâ kuăn pơlê hlê, pêi vâ kuăn pơlê hlo hlối loi, um méa mâu kăn ƀô̆ đảng viên ki kơhnâ tơmâng khât tung mơnhông hnê hriâm, khăm pơlât, hnê kuăn pơlê pro troăng prôk tung thôn, pêt loăng kơxu, pêt kơphế, ôh tá păn xếo mâu ro, chu í tung kơdâm hngêi, thế pro kơdroăng păn mơnăn păn pá kong, mơnhông pêt nhâ loăng pơkeăng... hmâ ƀă rơrêm ngế kuăn pơlê, tơrêm pơlê, tơrêm cheăm.

Pôa Trương Hồng Doan, Kăn hnê ngăn Đảng ủy cheăm Đăk Kôi, tơring Kon Braih ăm ‘nâi, Đảng ƀô̆ cheăm ai 156 ngế đảng viên, tung mê ai đảng viên kuăn ngo hên lối 83%. Mâu đảng viên đi đo djâ troăng ahdrối ƀă châ kuăn pơlê nhoăm pâ:

“Mâu đảng viên akố đi đo pơtối rak vế pêi pro ahdrối mâu tơdroăng cheăng malối tung tơdroăng kring vế tơniăn pơlê pơla cheăm bêng. Mâu đảng viên ƀă mâu chi ƀô̆ ki malối cho đảng viên hdroâng kuăn ngo đi đo hnê kuăn pơlê pôi tá tơmâng loi, pôi tá pêi pro tiô khu ‘mêi pơlông djâ pro tơdroăng ôh tá tro. Tung cheăm nôkố ôh pá ai xếo túa tơlá ton nah ki ôh pá tro. 451 rơpŏng kuăn ngo kơtiê, vâ chê kơtiê hiăng ‘nâi xúa tơƀrê mâu kơxô̆ liăn dêi rơpŏng hngêi, kơxô̆ liăn mung vâ mơnhông cheăng kâ dêi rơpŏng hngêi. Troh nôkố hên mâu rơpŏng kuăn ngo pêi cheăng kâ hiăng tơƀrê”.

Ing tơrŭm ivá, môi mơno dêi Đảng ƀă kuăn pơlê, kong pơlê Kon Tum hiăng kơdroh kơxô̆ rơpŏng kơtiê ing kơpêng 65% nah a rôh mơjiâng kong pơlê  hơnăm 1991  klêi mê hiăng chu ối pá xôp 11% a mơ’nui hơnăm 2022. Rĕng pê klêi tơdroăng pơcháu tâi tâng mâu cheăm ai troăng ô tô troh a cheăm; tơdroăng hnê hriâm châ mơnhông tơƀrê; Hngêi pơkeăng cheăm xuân ai ƀok thái pơkeăng…

Tơdrêng amê cho mơjiâng khu cheăng kal kí ó rơdêi ƀă 14 Đảng ƀô̆ dêi lối 31.300 ngế đảng viên. Pôa Nguyễn Thanh Long, 76 hơnăm, la hiăng 56 hơnăm ối tung Đảng a tôh 4, khô̆i 3, pơlê kân Đăk Tô, tơring Đăk Tô tối tiah kố, môi tung mâu tơdroăng ki tơƀrê má môi dêi Đảng ƀô̆ kong pơlê Kon Tum cho hiăng hnê mơhno, mơjiâng môi khu kăn ƀô̆ đảng viên kuăn ngo ki rêh ối a pơlê:

“Mâu kăn ƀô̆ mơngế kuăn ngo sap ing kong pơlê lăm troh a tơring, troh a cheăm mơhé hâi ai tiô tơdroăng púi vâ pơ’lêh nếo la vâ tối tâng kal vâi kô tâng vâi kố pơkuâ a mê vâi kô mơjiâng, vâi kô pơkuâ hnê mơhno kuăn pơlê vâ tối hiăng chiâng há ôh tá kal ai ing Tíu xiâm chu troh  hnê tối. Vâ tối tơdroăng kring gak tung pơlê cheăm tơniăn lĕm’’.

Kơtăn kố lối 2 hơnăm Khu kăn pơkuâ hnê ngăn Đảng kong pơlê Kon Tum pơtối hnê mơhno tơbleăng pêi péa tơdroăng mơhnhôk “Pro hơ’lêh túa tơchĕng tơmiât, túa pêi cheăng dêi kuăn pơlê hdroâng kuăn ngo, pro ăm mâu kuăn ngo mơ-eăm pêi cheăng kơhnâ vâ hluăn ing kơtiê xơpá krá ton”. Klêi lối 2 hơnăm tơbleăng pêi, lâp tung kong pơlê Kon Tum ai lối 6.100 rơpŏng hiăng hluăn kơtiê, rơpâu rơpŏng kuăn ngo hiăng tah lôi túa tơlá ton nah ki ôh pá tro, ôh tá tơkôm tơngah to a mâu ki ê, hiăng ‘nâi mơ-eăm ing ivá tơná tung pêi cheăng vâ mơnhông dêi rơpŏng hngêi; ‘nâi xúa khoa hok kih thuât tung pêi chiâk; vâ chê 3.600 rơpŏng kuăn ngo mot tung mâu tôh tơrŭm, khu pêi cheăng tơrŭm, a Kon Tum, châ Đảng tơmâng tŏng kum, rơtế hmâ ƀă kuăn pơlê.

Đảng viên A Niêng, Chi ƀô̆ thôn Tu Krối, cheăm Đăk Kôi, tơring Kon Braih, ăm ‘nâi:  

“Châ mot Đảng a hâk tơngăm ‘nâng. A kô mơ-eăm tâi ivá tơná mơ-eăm hriâm vâ hlê plĕng. A hriâm ki klâi a kô hnê ăm kuăn pơlê tơdroăng ki mê, kum kuăn pơlê a thôn châ pêt loăng plâi, păn mơnăn kum kuăn pơlê châ hluăn kơtiê xơpá. Hnê mơhno ăm mâu droh rơtăm ai cheăng pêi’’.

Tuăn loi dêi mơngế Rơteăng, Bơhnéa, Jêh –Triêng, Jarai, Brâu, Rơ Măm, Hrế a kong pơlê Kon Tum ƀă  Đảng, Pôa Hồ hiăng châ mơnúa ing péa rôh tơplâ xâ Pơhlăng ƀă Mih ki tơbriât pơkuâ. Tung tơdroăng pêi pro tiô pơkâ kuăn pơlê kro mơdrŏng, tơnêi têa rơdêi, kuăn pơlê môi tuăn, tơdâng tơ‘mô, rơkê plĕng, Đảng ƀô̆ kong pơlê Kon Tum môi tuăn dêi rơpó ƀă tuăn loi, krá kâk ƀă Đảng dêi mơngế Rơteăng, Bơhnéa, Jêh - Triêng, Jarai, Brâu, Rơ Mâm ƀă Hrế xuân môi tiah mâu kuăn ngo ki ê nôkố châ lối 54% kơxô̆ kuăn pơlê tung kong pơlê.