VOV4.Xơ Đăng - Kơxo lơ 10/6, a pơlê kong kơdrâm Ƀuôn Ma Thuột, kong pơlê Dak Lak hiăng po leh kĭ tơkêa tơrŭm cheăng mơjiâng rôh hôp hơ’lêh nếo tơmiât rơkê kơpong Tây Nguyên. Kố cho 1 tung mâu tơdroăng tơmiât rơkê dêi chin phuh Australia tung tơdroăng tơrŭm cheăng pơla Khu xiâm ngăn tơpui kâ ƀă tê mơdró Australia, Khu tơrŭm hriăn ngăn Khoa hok ƀă Kŏng ngê̆ kơpong kro mơdrŏng tơdjuôm (CSIRO) ƀă Khu xiâm ngăn Khoa hok – Kŏng ngê̆ Việt Nam. 5 to kong pơlê Dak Lak, Dak Nông, Gia Lai, Kon Tum ƀă Lâm Đồng rơtế CSIRO hiăng kĭ tơkêa tơrŭm cheăng Hneăng hôp Hơ’lêh nếo tơmiât rơkê kơpong Tây Nguyên.

Dak Lak, Dak Nông, Gia Lai, Kon Tum ƀă Lâm Đồng rơtế CSIRO hiăng kĭ tơkêa tơrŭm cheăng Hneăng hôp Hơ’lêh nếo tơmiât rơkê kơpong Tây Nguyên

Ki xiâm dêi rôh hôp kố cho mơdêk ƀă uâ pơliê kế tơmeăm pêi lo ing chiâk deăng vâ tŏng kum mơnhông krá tơniăn ton, pro tơdâng tơ’mô dêi kơvâ pêi chiâk deăng ƀă uâ pơliê kế tơmeăm pêi lo ing chiâk deăng a kơpong. Tung 3 hơnăm, rêm pâ kô po rơdâ ƀă mơdêk tơdroăng tơrŭm vâ pro tơ’lêi hlâu tung tơdroăng ki châ xúa mâu tơdroăng ƀă mâu tơdroăng ki tơƀrê hơ’lêh nếo tơmiât rơkê pro tơdroăng ki ai hlâu tung ƀă ôh tá ối tung Rôh hôp; Mơdêk pơkâ mơ’no mâu rơkong tơpui tối tơmiât nếo, rơtế ‘no liăn ƀă mơjiâng mâu kơxop hlá mơ-éa tơrŭm cheăng hriăn ngăn vâ mơdêk ki pơxúa tơxup tơbriât ăm mâu kế tơmeăm pêi lo ing chiâk deăng ki vâ tê ngi kong têa ê ƀă uâ pơliê kế tơmeăm tung kơpong.

Katarina Nga tơplôu ƀă tơbleăng