-Ô pôa, hâi lâp plâi tơnêi mơngế hên hơnăm a hơnăm kố (lơ 1/10) xuân cho roh ki mơhnhôk pêi pro mâu tơdroăng cheăng vâ gum ăm mơngế hiăng krâ. Ti mê, pâ phep pôa ăm ‘nâi, ki xiâm, tơdroăng cheăng xuân môi tiah mâu tơdroăng cheăng ki xiâm tung khế pêi cheăng kố?

Pôa Nguyễn Thanh Bình: Hơnăm kố, ngin hiăng tơkŭm po leh mơhnhôk hâi lâp tơnêi têa a kong pơlê Hải Dương. Nếo pơxiâm mơhnhôk thế pêi pro khế pêi tơdroăng cheăng la xuân dế pơtối mơhnhôk mơngế hơnăm hiăng krâ tơdjuôm ivá, mơ’no dêi hnoăng cheăng vâ pêi pro tiô hneăng mơhnhôk châ tơbrê, ai pơxúa má môi. Tung pơla pêi pro tơdroăng cheăng kố, ngin hiăng tơkŭm pơtâng tối krâu khât. Tung pơla pơkâ pêi pro kố, ngin ai tơkŭm hnê tối nhên ‘na ki xiâm rêi, hnoăng pêi pro tơdroăng cheăng xiâm dêi khê pêi pro vâ gum ăm mơngế hơnăm hiăng krâ Việt Nam hơnăm 2024. Ing mê, mơjiâng hnoăng cheăng ki vâ pêi pro kơhnâ khât, ai ta tơdroăng pơkuâ hnê djâ krá tơniăn dêi khu pơkuâ cheăng, mâu tíu cheăng, vâ pơkâ pêi pro khế pêi hnoăng cheăng châ tơƀrê, lĕm pơxúa má môi, ing mê, lân rơdâ troh rêm râ khu xuân môi tiah mâu tơdroăng cheăng dêi pơlê pơla. Ing mê, vâ mơhnhôk, hnê tối, veăng gum mơngế hơnăm hiăng krâ ki ối trâm hên xahpá a mâu pơlê cheăm tung lâp tơnêi têa.

-Pơla hdrối kố nah, Đảng, Tơnêi têa đi đo tŏng gum ngăn khât ƀă mơngế hên hơnăm, ing tơdroăng mê cho vâ mơhno tối nhên ing tơdroăng Khu hnê mơhno hiăng pơtroh hlá mơ-eá ki Mơgêi kơxô̆ 58 ‘na hnoăng cheăng dêi rêm ngế hơnăm hiăng krâ. Kố châ ngăn cho ki xiâm ki kal tung tơkŭm pêi pro, pơhlêh túa cheăng dêi Khu pơkuâ ngăn vâi hơnăm hiăng krâ, vâ vâi krâ pơtối mơnhông luâ tâ nếo hnoăng cheăng ki rơkê tung hnoăng cheăng tơdjuôm dêi tơnêi têa. Tiah mê, pôa tối ăm ‘nâi nhên ‘na tơdroăng kố?

Pôa Nguyễn Thanh Bình: Tiah mê, drêng ai Pơkâ kơxô̆ 58, kơnôm châ ai tơdroăng tŏng gum dêi khu râ, kơvâ cheăng, ngin hiăng pơkâ hnê tối, tơrŭm cheăng krá tơniăn ƀă mâu kơ koan xiâm râ tơnêi têa pơkâ pêi pro adrêng, kring vế tơniăn tơdroăng ki tơrŭm dêi hnoăng cheăng ing râ tơnêi têa troh a pơlê cheăm. Ing tơdroăng pơkâ pêi pro mê hiăng kêi troh dâng lâi krá tơniăn troh dâng mê, ing mê, pơhlêh túa cheăng a 5 kong pơlê, pơlê kong kân xua dế nôkố 50 kong pơlê, pơlê kong kân dế pêi pro tiô túa râ kong pơlê, râ tơring hiăng ai Khu hnê mơhno hnoăng cheăng ki kố. Xua ing mê, drêng tơdroăng cheăng dêi khu chiâng 4 râ, hnoăng cheăng hiăng châ xing xoăng nhên, mê rêm hnoăng cheăng pơrá châ mơdêk khât. Rế pêi pro lĕm tro hnoăng cheăng rak ngăn, rế châ pơtối mơdêk hnoăng cheăng dêi mơngế hên hơnăm, vâ vâi hơnăm hiăng krâ pơtối châ pêi viâ tơdroăng, veăng ‘no dêi ivá, tuăn rơkê tung tơdroăng mơnhông tơnêi têa.

-Ô pôa, tiô tơdroăng ăm ‘nâi, tung roh khía mơhot kân má 3 pơla hdrối kố nah rơtế ƀă tâi tâng kuăn pơlê tung lâp tơnêi têa, Khu ngăn vâi hơnăm hiăng krâ Việt Nam xuân hiăng ai tơlo hên kế tơmeăm, mơhnhôk hiâm tuăn ăm kuăn pơlê a kơpong ki tro khía mơhot têa kân lân lu pro, mâu vâi ki trâm hliăng tiâ, xahpá, tro hía ‘na mơngế, kế tơmeăm, hngêi trăng. Tiah mê, pôa tối ăm ngin ‘nâi nhên ‘na tơdroăng ki tơdjuôm ivá, kế tơmeăm vâ tŏng gum ăm tơdroăng cheăng kố?

Pôa Nguyễn Thanh Bình: Hnê mơhno, rak vế, pêi pro tiô tơdroăng hnê tối dêi pôa Tô Lâm, Kăn xiâm pơkuâ hnê ngăn, Kăn xiâm hnê ngăn tơnêi têa; pêi pro tiô tơdroăng i krếo thế dêi Vi ƀan Tíu xiâm Măt trâ̆n Tơnêi têa Việt Nam, mơhnhôk veăng tơdjuôm ivá, mơno, vâ i tŏng gum ăm kuăn pơlê mâu kong pơlê ki tro tơdjâk khía mơhot kân roh má 3, ngin hiăng teăm mơ’no hlá mơ-eá pơtroh ƀă pêi pro tiô tơdroăng ki pơkâ hnê dêi Tí xiâm tơnêi têa troh a mâu thôn, pơlê. Rêm ngế hơnăm hiăng krâ rế mơhnhôk hnoăng cheăng, tơdrêng amê, mơhnhôk kuăn cháu, mơhnhôk mâu vâi pú tung khu hơnăm hiăng krâ lâp tơnêi têa veăng tơlo liăn ngân, kế tơmeăm, tŏng gum ăm mâu vâi krâ-nhŏng o a mâu kong pơlê ki tro khía mơhot kân roh má 3 pro pro hlâ kuăn mơngế, tơ’nhiê hngêi trăng, tơmeăm khoăng.

-Hôm, mơnê kơ pôa!