Ối chôu vế tơdroăng ki hơniâp ro mâu hâi ki tung lâp tơnêi têa hơniâp ro koh tơbâ 78 hơnăm hâi mơjiâng Tơnêi têa lơ 2/9/2023, on veăng pôa Hoàng Minh Lý, 79 hơnăm, thôn 8, cheăm tơkăng kong Ea Ƀung, tơring Ea Súp xuân ối phoih ƀriê tung hiâm mơno. Drêng kố, on veăng pôa mơhúa châ Đông Gak tíu tơkăng kong dêi Đông Dak Ruê rơtế ƀă mâu khu ngế ki ai hiâm tuăn rơkê mơjiâng pro ăm hngêi “Tơtô a tíu tơkăng kong” kơnâ châ 80 rơtuh liăn. Pôa ai tối tiah kố, a hơnăm ki hiăng krâ kố, thăm nếo trâm tro châi tamo, tơdroăng ki ai hngêi mĕn xơmong krá kâk tiah kố cho tơdroăng ki pói tâi plâ rơxông, nôkố nếo hlo ai khât:

“Á hơniâp ro khât, hơniâp cho xua mâu pú hmâ mô đô̆i gak tơkăng kong hiăng krếo thế mâu khu ki ai liăn ngân tŏng kum tá tuăn tá hiâm troh rơpŏng hngêi á, mơjiâng pro ăm á môi toăng hngêi ki phâi tơtô. Drêng klêi pro hngêi ki kố, á mot rêh ối, ôh tá préa xâu lơ ai tơdroăng hngêi tro xi kơchoh, lơ tro khía mơhot pê plong. Á ai toăng hngêi ki krá tơniăn lĕm, tơdroăng rêh ối thăm rế châ rak vế dêi ivá ƀă châ rêh ối ton”.        

Ea Ƀung cho môi tung 3 to cheăm tíu tơkăng kong dêi tơring Ea Sup. Lâp cheăm ki kố ai 1 rơpâu 53 rơpŏng, ai lối 4 rơpâu 100 pơ’leăng mâ mơngế, ối tung 8 hdroâng kuăn ngo rơtế rêh kâ ối. Tơdroăng kring vế, gak ngăn châ pêi pro kơtăng khât, tơdroăng rêh kâ ối dêi kuăn pơlê rế hía rế châ mơnhông. Pôa Trần Thanh Thản, Kăn hnê ngăn Vi ƀan Măt trâ̆n Tơnêi têa Việt Nam cheăm Ea Ƀung ai tối tiah kố, khoh châ chiâng ai tơdroăng kố, kơnôm ing tơdroăng tŏng kum dêi khu mô đô̆i Gak tíu tơkăng kong dêi Đông Dak Ruê.

“Rêm hơnăm mâu pú mô đô̆i po mâu lâm hnê mơhno tơdroăng cheăng kring vế tơniăn Tơnêi têa, kơpong tíu tơkăng kong ƀă mơjiâng po mâu lâm hnê tối ăm kuăn pơlê, tŏng kum kuăn pơlê pêi chiâk deăng, mơdâ pêt hdrê báu ki dâi lĕm, kih thuât păn roăng, rak ngăn ro. Tơdrêng amê, a mâu roh leh, Têt rêm hơnăm Đông xuân hmâ lăm pôu, tơpui tơno, hbru kế tơmeăm ăm mâu rơpŏng kơtiê, rơpŏng ai hnoăng kăch măng vâ mơhnhôk vâi hơniâp ro, koh tơdah Têt châ phâi tơtô, hơniâp ro”.

Đông tíu tơkăng kong Dak Ruê dế nôkố pơkuâ ngăn troăng tíu tơkăng kong ai dâng 8km ƀă tơneăn 42 ối tung cheăm tíu tơkăng kong Ea Ƀung, tơring Ea Súp, kong pơlê Dak Lak, tơkoh ƀă kong pơlê Mundulkiri, kong têa Kul. Thươ̆ng tă Phạm Đức Khá, Kăn pơkuâ ngăn cheăng kal kí Đông Mô đô̆i Dak Ruê tối ăm ‘nâi, mâu hơnăm hdrối mê hía nah, rơtế ƀă hnoăng cheăng kring vế, gak ngăn krá tơniăn tơdroăng rêh ối tíu tơkăng kong, mâu kăn ƀô̆, mâu lêng dêi đông ối mơjiâng krá tơniăn tung hiâm mơno kuăn pơlê tung tơdroăng veăng kring vế, gak ngăn tíu tơkăng kong.

Ƀă hnoăng cheăng “Đông cho hngêi, tơkăng kong cho pơlê, kuăn pơlê mâu hdroâng kuăn ngo cho nhŏng o môi klêa môi kliâm”, mê Đông hiăng pêi pro châ tơƀrê khât mâu tơdroăng ki tŏng kum tơdroăng rêh ối dêi pơlê pơla, kơnôm ing mâu tơdroăng, môi tiah: kring vế gak ngăn Jâ Nôu Việt Nam khên tơnôu, “kuăn roăng đông tơkăng kong”, “chông djâ chêng o troh a hngêi trung”, “hâi leh kơxuô kơƀăn tơxông, mơjiâng hngêi “tơtô a tíu tơkăng kong”, veăng kum mâu túa cheăng vâ mơnhông pêi cheăng kâ, kơdroh kơklêa, xăm kơtiê. Tơdrêng amê, Đông ối kơhnâ khât tung tơdroăng rak vế ngăn  mâu pơlê cheăm, veăng kum Đảng ủy, khu râ kăn pơkuâ mơjiâng hngêi pêi cheăng, troăng klông, mơjiâng thôn pơlê nếo, veăng hnê tối chi ƀô̆ rế hiá rế krá rơdêi tung hên kơvâ cheăng, pêi pro châ tơƀrê mâu troăng pơkâ, troăng tơdjâ dêi Đảng, Tơnêi têa. Thươ̆ng tă Phạm Đức khá tối ăm ‘nâi:

“Dế nôkố, ngin ai 16 ngế cho đảng viên ối tung khu veăng hnê tối ăm 6 chi ƀô̆ mâu thôn pơlê; 16 ngế kăn ƀô̆ kố châ pơcháu hnoăng cheăng pơkuâ hnê ngăn mâu rơpŏng kơtiê ki ối tung thôn pơlê tíu tơkăng kong. Khu ki kố, ngin đi đo hnê tối vâ pơkuâ ngăn mâu chi ƀô̆ thôn pơlê vâ pêi pro mâu Tơdroăng pơkâ dêi pơlê cheăm, tơring, pro ti lâi vâ ga tơtro ƀă tơdroăng rêh kâ ối ki păng ‘nâng dế nôkố. Ing mê, veăng tối tơbleăng ăm khu râ kăn pơkuâ hnê ngăn Đảng rêm râ rơtế ƀă mâu pơlê cheăm mơjiâng thôn pơlê, cheăm rế hía rế ó rơdêi, kuăn pơlê rêh ối a tíu tơkăng kong rế hía rế ai tơdroăng rêh kâ ối phâi tơtô ƀă hơniâp ro hên tâ”.

Tơdroăng tŏng kum dêi khu mô đô̆i gak tíu tơkăng kong hiăng veăng kum ăm cheăm Ea Ƀung chiâng cheăm tíu tơkăng kong ki apoăng dêi kong pơlê Dak Lak châ plah thôn pơlê nếo a hơnăm 2021. Tơdroăng rêh kâ ối rế hía rế châ mơnhông tơtêk, vâi krâ-nhŏng o thăm kơhnâ khât tung veăng rơtế kring vế, gak ngăn, krá tơniăn hnoăng pơkuâ ngăn tíu tơkăng kong dêi tơnêi têa pin.