Hôp tơpui mê ai 55 tham luâ̆n ing mâu ngế ki rơkê, ngế cheăng khoa hok ƀă ngế rak ngăn, Học viện Chính trị Quốc gia Hồ Chí Minh, mâu kơ koan tăng ‘nâi plĕng, mâu hngêi trung hnê tơdroăng kal kí, rơtế ƀă mâu khu tơrŭm cheăng kal kí - pơlê pơla dêi kong pơlê Gia Lai ƀă mâu kong pơlê tung kơpong Tây Nguyên.

Mâu tham luâ̆n mê xuân chêh tối hnoăng cheăng ki kal dêi ngế kuăn pơlê pâ nhoăm tung kuăn pơlê, ing hnê tối, mơhnhôk kuăn pơlê troh veăng mơnhông cheăng kâ - rêh ối pơlê pơla, mơjiâng thôn pơlê nếo, ‘mâi mơnhông kal kí a pơlê cheăm, rak ki môi tuăn dêi hdroâng kuăn ngo; pơtối kring tơniăn, cheăng lêng ƀă tơniăn rêh ối a pơlê cheăm. Hên mâu kăn tối, vâ mơngế ki kuăn pơlê pâ nhoăm pơtối pêi hnoăng cheăng tơná, thế pro tơ’lêi hlâu ăm ngế ki kuăn pơlê pâ nhoăm veăng pêi mâu tơdroăng cheăng kal kí - rêh ối pơlê pơla a pơlê cheăm, hriâm tơ’nôm vâ rế hlê plĕng, malối ‘na hnoăng cheăng séa ngăn, tơdroăng pơlê pơla ƀă mơhnhôk kuăn pơlê a pơlê cheăm.