Tơpui a rôh hôp, pôa Nguyễn Thái Học, Kăn phŏ ngăn Khu pơkuâ tơdroăng cheăng Tơnêi têa tối nhên, ƀă kơvâ cheăng ki tơdjâk troh cho kơ koan tí tăng ‘nâi plĕng tung la ngiâ dêi Đảng tung kơvâ cheăng tơnêi têa, hbrâ, mơdât kâ kơluâ ƀă hơ’lêh luât, Khu pơkuâ ngăn tơnêi têa châ Hô̆i đong Khoa hok mâu kơ koan Đảng Tơnêi têa, pơcháu hriăn ngăn đề tài khoa hok ki kal vâ ing mê hbrâ ăm tơdroăng chêh bro mâu hlá mơ-éa pơtroh Hneăng hôp rôh má 14 dêi Đảng.

A rôh hôp mâu kăn, mâu khu ki hriăn ‘na khoa hok hiăng rơtế ƀă dêi rơpó tơpui tơno nhên tơdroăng: Tơdroăng mơnhông ki hlê plĕng ‘na lĭ luâ̆n dêi Đảng pin ‘na hnoăng cheăng tí tăng ‘nâi plĕng dêi mâu kơ koan Đảng a Tơnêi têa tung kơvâ cheăng tơnêi têa, hbrâ mơdât kâ kơluâ, mâu tơdroăng hơ’lêh luât; Mơnhên tối klêi kơ’nâi mâu tơdroăng ki pêi tơƀrê, mâu tơdroăng ki tá hâi pêi klêi ƀă ƀai hriâm ki rơkê tung hnoăng cheăng tí tăng ‘nâi plĕng dêi mâu kơ koan Đảng.

Ing mê, mơ’no tối mâu tơdroăng ki nếo pơkâ mơ’no kal tơkŭm pơkâ tơleăng ƀă mâu hnoăng cheăng troăng hơlâ ki kal, pâ thế pơkâ mơ’no, vâ mơdêk ki rơkê tung hnoăng cheăng tí tăng ‘nâi plĕng dêi mâu kơ koan Đảng.