VOV4.Xơ Đăng -  Tơbleăng a hneaăng hôp dêi Khu hnê mơhno cheăng hbrâ mơdât COVID-19, pôa Phạm Minh Chính, Ngế pro xiâm hnê ngăn Chin phuh pơkâ  thế mâu kơvâ cheăng mâu kong pơlê séa ngăn tơdroăng pơreăng tâ tú tung tơnêi têa ƀă tung lâp plâi tơnêi, séa ngăn hnê tối hdrối dêi mâu khu tơrŭm cheăng lâp plâi tơnêi, mâu khu cheăng ‘na khoa hok, teăm châ ‘nâi, tối tơbleăng hdrối mâu tơdroăng ki hâi tơbleăng, môi tiah virus kô chiâng hmâ ƀă vaccine lơ kô chiâng pro ai tơdroăng châi ki  nếo, pơreăng kô pro chiâng châi tơdroăng ki tơ ê, ôh tá ‘nâi hdrối  lơ pá tâ pơlât prêi.

Ngế pro xiâm hnê ngăn tơnêi têa pơkuâ hneăng hôp hnê mơhno ‘na tơdroăng cheăng hbrâ mơdât pơreăng.

Mơdêk tâ nêó tơdroăng pâk vaccine, malối ƀă mâu ngế ki nhông tơ’lêi tâ tú  môi tiah mâu hơnăm hiăng hên, hiăng krâ, mâu ngế tung châ hiăng ai tơdroăng châi hdrối, vâi ‘nĕng, mâu kŏng nhân ki pêi cheăng a mâu kơpong hngêi kơmăi, kơpong hngêi kơmăi ki mơjiâng pro tơmeăm khoăng, kơphô̆ ki kân ƀă hía hé, tơkŭm séa ngăn ki ôh tá mơhúa, mâu ngế ki rế râ ó ƀă hlâ, pơtối mơdêk   hbrâ pơkeăng pơlât, khăm pơlata a hngêi pơkeăng cheăng; hbrâ ‘na pơkeăng, mơdêk hlê plê̆ng dêi kuăn pơlê. Ngế pro xiâm hnê ngăn tơnêi têa pơkâ thế pê klêi pâk vaccine ăm vâi ‘nĕ ing 12 hơnăm troh 18 hơnăm tung khế 4 kố; ƀă mâu vâi muăn ing 12 hơnăm ngin thế mơhno ki mơ-eăm má môi pê klêi pâk tung pơla xap khế pŭn troh khế tơdrốu hơnăm 2022.

Gương tơplôu ƀă tơbleăng