Kơxo hnah, lơ 29/11, tiô chô kong têa kố, leh tơdah păng ‘nâng Ngế pro xiâm hnê ngăn Chin phuh Phạm Minh Chính hiăng tơkŭm po kân krip a Tíu pêi cheăng Kăn xiâm pơkuâ kong têa Thổ Nhĩ Kỳ xua Kăn xiâm phŏ pơkuâ kong têa Thổ Nhĩ Kỳ Cedet Zilmaz pơkuâ. Kơ’nâi mê hlối, Ngế pro xiâm hnê ngăn Chin phuh Phạm Minh Chính hiăng tơpui ƀă Kăn xiâm phŏ pơkuâ kong têa Thổ Nhĩ Kỳ Cedet Zilmaz.

A roh tơpui tơno,  péa pâ hiăng tối tơbleăng ăm dêi pó ‘na tơdroăng cheăng kâ, kal kí – rêh ối pơlê pơla a rêm tơnêi têa ƀă tơpui tơno ‘na mâu tơdroăng lâp plâi tơnêi ƀă kơpong rơhêng vâ ‘nâi plĕng. Péa kăn xiâm pơkuâ mơnhên pói vâ ƀă khŏm mơ-eăm mơdêk tâ mê nếo tơrŭm cheăng nhŏng o ƀă tơrŭm hên tơdroăng Việt Nam – Thổ Nhĩ Kỳ xua pơxúa tơdjuôm dêi kuăn pơlê péa tơnêi têa, xua hơniêp lĕm, tơniăn ƀă mơnhông a péa kơpong ƀă tung lâp plâi tơnêi. Péa kăn pơkuâ môi tuăn kal pơtối pro rơdêi ƀă mơdêk tâ mê nếo tơrŭm cheăng kal kí – tơpui kâ lĕm ing tơdroăng mơdêk tâ mê nếo tơdroăng tơpui tơno mâu khu râ, ki rơhêng vâ tối cho mâu khu râ kăn xiâm.