Tối tơbleăng a rôh trâm mâ, Ngế pro xiâm hnê ngăn tơnêi têa Phạm Minh Chính, pơtroh rơkong rơkâu ki lĕm má môi dêi Kăn xiâm hnê ngăn Đảng Nguyễn Phú Trọng troh tâi tâng mâu thái cô ki ai mâ a rôh trâm mâ hâi kố ƀă hlối pơtroh rơkong rơkâu ăm mâu rơxông thái cô tung lâp tơnêi têa tơdroăng ki lĕm má môi.

Pêi pro tiô Pơkâ Hneăng hôp má 13 dêi Đảng ƀă Pơkâ kơxô̆ 29 dêi Ngế pro xiâm hnê ngăn tơnêi têa pơkâ thế kơvâ hnê hriâm ƀă hnê mơjiâng tuăn ngôa rơkê kal pơtối pê klêi pơkâ, tơdâng, tơƀrê pơxúa pê klêi mâu hnoăng cheăng, troăng rơhlâ pơ’lêh nếo, tung tŭm tơdroăng hnâ hnê hriâm ƀă hnê mơjiâng tuăn ngôa rơkê, mơdêk ki tơƀrê tung hnê hriâm a rêm râ  hriâm.

Ngế pro xiâm hnê ngăn tơnêi têa loi tiah kố, rêm ngế thái cô kố pơtối mơ-eăm hnê, đi đo cho ngế ki mơhno troăng lĕm ‘na hiâm mơno, hriâm rơkê,  hâk vâ khât ƀă tơdroăng hnê, pâ mơngế; mơdêk ki hlê plĕng tơdroăng cheăng hnê, ‘nâi hriâm tơdroăng ki nếo tung hnê ƀă hriâm; vâ rêm chôu hriâm cho tơdroăng ki pơxúa ƀă rêm hâi hriâm ƀă hlối ro.