Veăng hôp ai Ngế pro xiâm hnê ngăn tơnei têa, Ngế pơkuâ khu kăn mâu kong têa Kul-Lếo, Myanmar, Siam, Sinuâ bă Việt Nam. Ngế pro xiâm hnê ngăn tơnei têa Phạm Minh Chính hiăng tối tơbleăng ki kal dêi hneăng Hôp. Hneăng hôp tơkŭm tối tơdroăng tơrŭm cheăng Mekong - Lan Thương tung pái hơnăm hdrối ƀă tơpui tơno tiô troăng rơhlâ ăm pơla rôh la ngiâ.

Mâu kăn tối nhên hnoăng veăng ‘no ki kal dêi MLC ƀă tơdroăng hơniâp lĕm, tơrŭm ƀă mơnhông tơƀrê a kơpong Mekong ƀă kơpong, pakĭng mê pơtối tơrŭm krá, rơtế ƀă dêi rơpó mơjiâng khu kong têa hnê tối ăm dêi rơpó mâu tơdroăng cheăng pêi tung la ngiâ ‘na hơniâp lĕm, kro mơdrŏng pơla mâu kong têa Mekong - Lan Thương.

‘Na troăng vâ tơrŭm cheăng tung la ngiâ, mâu  kăn  tối nhên troăng rơhlâ pêi ahdrối mơnhông tơƀrê, xo kuăn pơlê pro xiâm ối tơdế rá, tơniăn lĕm pơla kuăn mơngế ƀă kong kế. Hneăng hôp vâ môi tuăn mơdêk tơrŭm cheăng rơtế mơjiâng troăng ví pákĭng mơnhông cheăng kâ Mekong – Lan Thương; tí tăng ‘nâi plĕng  mơjiâng luât hôp, tơrŭm ƀă luât tŏng kum, tơbleăng mâu tơdroăng tơkêa bro mơnhông mơdêk Tơdroăng cheăng pơ’lêh nếo hriăn plĕng ki nếo Mekong – Lan Thương.

Tối tơbleăng a hneăng Hôp, Ngế pro xiâm hnê ngăn tơnêi têa Phạm Minh Chính tối nhên, Chin phuh Việt Nam đi đo nhoăm ƀă kô pơtối rơtế ƀă Sinuâ ƀă mâu kong têa Mekong mơdêk tơrŭm cheăng Mekong – Lan Thương rế tơƀrê, pơxúa ƀă krá tơniăn ton.