Hneăng hôp po hôp tơdrêng tiô troăng hyôh pơla tíu xiâm mơ’no a Tíu pêi cheăng Chin phuh ƀă 63 to kong pơlê, pơlê kong kân dêi tíu xiâm. Tối mơgêi a hneăng hôp, pôa Phạm Minh Chính - Ngế pro xiâm hnê ngăn tơnêi têa tối tiah kố kơ’nâi 10 hơnăm tơbleăng pêi Pơkâ 22 hiăng hlo hơ’lêh kân. 

Tơdroăng cheăng kal kí, tơmeăm ki ai hlâu dêi tơnêi têa châ mơnhông mơdêk, Tơdroăng tơrŭm cheăng lâp plâi tơnêi châ po rơdâ. Ngiâ méa tơnêi têa hiăng hơ’lêh tơ-ê, GDP tâk vâ chê 2 hdroh tâng vâ pơchông ƀă 10 hơnăm hdrối. Ngế pro xiâm hnê ngăn Chin phuh tối nhên, ối iâ hâi kô troh hâi Khu hnê mơhno cheăng thế pê klêi tơdroăng cheăng mơgêi, tơbleăng ăm Khu xiâm kal kí. Vâ mơdêk rĕng tâ tơdroăng tơbleăng pêi mâu tơdroăng cheăng mơgêi, Ngế pro xiâm hnê ngăn tơnêi têa pơkâ thế Khu hnê mơhno cheăng ƀă Tôh rah chêh tơkŭm, rĕng mơnhên tơmeăm ki mơ’nui dêi tơdroăng Tơkêa bro vâ mơgêi, mê cho tí tăng ‘nâi plĕng ăm Khu xiâm kal kí pơkâ môi hlá mơ-éa hnê mơhno ‘na tơrŭm cheăng lâp plâi tơnêi tung tơdroăng rêh ối nếo nôkố.