Pôa Phạm Minh Chính, Ngế pro xiâm hnê ngăn Chin phuh nếo pơkuâ rôh hôp má 5 Khu kăn xiâm hnê mơhno cheăng dêi Chin phuh mơgêi tơdroăng Pơkâ kơxô̆ 18 NQ/TW “Mâu tơdroăng ‘na pơtối hơ’lêh nếo, xing xoăng tơkŭm rah mâu ngế pêi cheăng tung khu cheăng kal kí xo iâ mơngế, pêi cheăng  ƀeăn rơkê, hlối tơƀrê’’.  

A rôh hôp, Khu hnê mơhno cheăng hiăng tơmâng tối tơbleăng ƀă tơpui tối, ăm veăng hnê tối ‘na tơdroăng chêh tung hlá mơ-éa ki vâ pơtroh dêi Khu kăn Đảng Chin phuh pơtroh ăm khu xiâm kal kí ‘na tơdroăng Tơkêa bro mơgêi pêi cheăng dêi khu kăn Đảng Chin phuh, mơjiâng Đảng ƀô̆ Chin phuh cho dêi Tíu xiâm tơnêi têa. Tiô troăng hơlâ dêi Khu hnê mơhno Xiâm tơnêi têa, Đảng ƀô̆ Chin phuh ai mâu khu tơrŭm cheăng tung mâu khu xiâm, kơ koan ki tơdâng khu xiâm, kơ koan cheăng cho tung Chin phuh ƀă mâu Đảng ƀô̆ tung mâu khu, Khu xiâm pơkuâ kŏng ti, Hngêi rak liăn tê mơdró tơnêi tơnêi têa.

Tối mơgêi rôh hôp, Ngế pro xiâm hnê ngăn tơnêi têa pơcháu ăm Khu xiâm ngăn ‘na cheăng pêi tơrŭm ƀă mâu kơ koan tơdjâk troh  tơmâng xo mâu tơdroăng veăng hnê khĕn, pê klêi hlá mơ-éa chêh Tơdroăng tơkêa bro hdrối pơtroh ăm Khu xiâm Kal kí. Tung pơla mơjiâng, pêi klêi tơdroăng Tơkêa bro, thế pêi kơtăng tro tiô Luât Đảng, mâu luât pơkâ dêi mâu kăn, mâu pơkâ dêi Đảng ƀă pêi tro mâu tơdroăng hnê pêi pro dêi Chin phuh.