VOV4.Xơ Đăng - Tiô rơkong krếo thế dêi pôa Kishida Fumio, Ngế pro xiâm hnê ngăn kong têa Nhuk, pôa Phạm Minh Chính, Ngế pro xiâm hnê ngăn tơnêi têa veăng ƀă xông tơpui tơdrêng tung um tiô troăng hyôh Internet a Hneăng hôp khu râ kăn xiâm roh má 4 kơpong châu Á – Thái Bình Dương ‘na tê. Xông tơpui a Hneăng hôp, pôa Phạm Minh Chính tối nhên, mâu tơdroăng tơdjâk tá hâi ai dêi mâu tơdroăng pơloăng mơnúa dêi lâp tơnêi têa môi tiah pơreăng COVID-19, kong prâi hơ’lêh, xo tơmeăm lối hên hluâ râ mâu tơmeăm tung kong kế, kơdâm tơnêi, tung mê ai têa, hiăng ƀă dế pro tơdjâk ‘mêi kân ƀă hên tơmeăm ăm rơxông hâi kố ƀă la ngiâ, pơkâ thế ai troăng châ achê ƀă troăng pêi lâp plâi tơnêi.

Ngế pro xiâm hnê ngăn Chin phuh mơnhên tung pơla kố nah, Việt Nam đi đo veăng ƀă veăng tơlo hên tung tơdroăng mơ-eăm tơdjuôm tung rêm râ tơrŭm cheăng lâp plâi tơnêi, ki má lối cho ƀă mâu kong têa ai tơdjuôm kơnhŏng têa ƀă Việt Nam môi tiah Lếo, Kul, Sinuâ ƀă mâu khu tơrŭm lâp plâi tơnêi ki ê vâ pơkuâ, mơnhông mơdêk, gak kring ƀă xúa krá tơniăn ƀă châ tơƀrê, rơtế ai pơxúa têa ing mâu têa kroăng.

A Sa Ly tơplôu ƀă tơbleăng