A roh hôp kố, mâu kăn xiâm vêh mơnhên ngăn nhoăm khât tơrŭm cheăng pơla mâu kong têa tung kơpong riân sap ing hơnăm tơrŭm cheăng dêi pó a hơnăm 1990. ASEAN vêh mơnhên hôm khât tâi tâng mâu kong têa tung GCC pơrá hiăng mot tung Tơdroăng kĭ tơkêa ki lĕm tro ƀă tơrŭm krá khât pơla mâu kong têa ối peăng mâ hâi lo pá Hdroh châu Á, tơdrêng amê, hâk kơdeăn mâu kong têa tung Arab Thống nhât hiăng châ khu ki tơrŭm xiâm dêi kơvâ cheăng dêi ASEAN riân sap ing hơnăm 2022.

Pơkâ pêi pro mâu hnoăng cheăng tung la ngiâ, Khu xiâm pơkuâ mâu kong têa ối tung ASEAN prế GCC hiăng vâ môi tuăn kal tơpui tơno đi đo ƀă dêi pó, ‘mâi mơnhong ki krá rơdêi tung tơrŭm, tơdrêng amê, thăm mơdêk tơrŭm cheăng tơdâng tơ’mô, rơtế ai pơxúa, tŏng kum ngăn khât tung tơrŭm cheăng ‘na kơvâ pêi cheăng kâ, tê mơdro, mơ’no liăn, kring vế tơniăn tơmeăm pêi lo tá troh a tê mơdró krá tơniăn, tơrŭm cheăng a têa kơxĭ, kring vế têa châu têa kơxăng, on tơhrrik, kế kâ, tơmeăm dâi, hbrâ mơdât, ví ing xâu xía xua hyôh kong prâi hơ’lêh ƀă hên hĕng mâu tơdroăng ki ê. Roh hôp mê tối tơbleăng rơkong Tối tơbleăng tơdjuôm, vêh mơnhên tối mâu tơdroăng ki hiăng châ chiâng pêi pro tiô tơdroăng pơkâ tơdjuôm ƀă mâu hnoăng ki hiăng vâ môi tuăn dêi Khu xiâm pơkuâ ngăn tung thăm mơnhông tơrŭm cheăng pơla ASEAN ƀă GCC tung la ngiâ.