Hneăng hôp, mâu kăn hiăng tơpui hên tơdroăng troăng ki kal, tơdroăng pơkâ pêi, troăng vâ mơnhông ƀă trăng rơhlâ pêi pro tung Pơkâ Kơpong rôh kố. Mơgêi hneăng hôp, Ngế pro xiâm hnê ngăn Phạm Minh Chinh tối nhên, ‘na tuăn tơmiât, troăng pơkuâ, hnê mơhno  mâu tơdroăng cheăng, kal tơmâng pơkâ nhên, tro achê ƀă pêi kơtăng tro tiô Pơkâ hneăng Hôp kân má 13 dêi Đảng ƀă Pơkâ dêi Khu xiâm kal kí; Pơkâ 5 hơnăm, Troăng rơhlâ 10 hơnăm mơnhông cheăng kâ- rêh ối; tro tiô pơkâ Hneăng hôp Đảng ƀộ rêm râ.  

Ngế pro xiâm hnê ngăn tối nhên thế pro trâu khât tâ nếo tơdroăng cheăng, hnoăng cheăng pêi ki kal dêi kơpong  ƀă tơnêi têa mê cho mâu kơvâ cheăng ki kal môi tiah kal kí, cheăng kâ, kring tơniăn ‘na cheăng lêng, ing mê tăng xiâm tơdroăng cheăng ki ai hlâu phá xêh, pro rôh ki tơ’lêi hlâu vâ tơbriât  cheăng. Ngế pro xiâm hnê ngăn tơnêi têa tối nhên hnoăng cheăng pêi, tơdroăng cheăng ki tơná pêi, tơmeăm khoăng ai hlâu dêi kơpong  Đông Nam Bộ, ai tŭm ivá kal mơnhông chiâng tíu xiâm, djâ troăng a hdrối, túa mơnhông cheăng kâ-rêh ối dêi tơnêi têa.