VOV4.Xơ Đăng - Kơxê lơ 11/7, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng tơdah tơpui tơno ƀă pôa Santiago Andres Cafiero, Ngế xiâm ngăn tơpui kâ, Ngế xiâm ngăn tê mơdró ƀă ‘na Loi tĭng tiô khôp kong têa Argentina, drêng troh lăm pôu pêi cheăng a Việt Nam sap hâi lơ 9-11/7.

A rôh tơdah, Ngế xiâm tơpui kâ pơkâ thế péa pâ tơrŭm krá  vâ mơdêk mâu rôh lăm pôu ƀă trâm mâ mâu kăn xiam, mơjiâng pơkâ vâ pro leh tơbâ 50 hơnăm hâi mơjiâng tơrŭm cheăng tơpui kâ pơla péa tơnêi têa a hơnăm 2023; pơtối rak vế tơrŭm môi tuăn dêi rơpó a mâu rôh tơkŭm po hôp lâp plâi tơnêi ƀă hneăng hôp rêm pâ, veăng ‘no hnoăng pêi pro tung tơleăng mơnhên mâu tơdroăng tung kơpong ƀă lâp plâi tơnêi.

Ngế pro xiâm hnê ngăn tơdah Ngế xiâm tơpui kâ, Ngế xiâm ngăn tê mơdró ƀă ngăn ‘na loi tĭng tiô khôp kong têa Argentina

Ngế xiâm ngăn ‘na tơpui kâ Argentina púi vâ djâ tơrŭm cheăng tung tŭm tơdroăng ƀă Việt Nam rế tơ-brê tâ nếo. Ngế xiâm tơpui kâ tơhrâ kô mơdêk mâu Khu xiâm kơvâ cheăng peăng Argentina, tơrŭm ƀă peăng Việt Nam mơdêk tơrŭm tung hên tơdroăng cheăng pơla Việt Nam ƀă Argentina, rế tơ-brê pơxúa tâ; vâ mơjiâng tơrŭm rế tơ-brê tâ nếo tung mâu kơvâ cheăng on tơhrik ƀă ‘na chiâk deăng xua vâ pro pơxúa ăm kuăn pơlê péa tơnêi têa.

Gương tơplôu ƀă tơbleăng