Hơnăm 2023, Khu xiâm ngăn troăng prôk ƀă rơxế kơtâu hiăng tơkŭm séa ngăn, pêi klêi, mơdêk ki rơkê mơjiâng troăng hơlâ tŏng kum ƀă hiăng pêi klêi hên tơdroăng ki kal. Ki kal cho mơdêk xing xoăng râ, xoăng hnoăng tung mâu kơvâ cheăng pơkuâ ngăn tơnêi têa ối tung Khu xiâm ngăn troăng prôk ƀă rơxế kơtâu.

Malối ‘na ki tơƀrê dêi hngêi trăng, ƀă tơdroăng ki pơxiâm pro 26 Tơdroăng tơkêa, tung mê pro ‘nâng ‘nâi hâi khế pro 06 tơdroăng tơkêa ki kal dêi tơnêi têa ƀă rôh apoăng pơxiâm pro hên hĭn tiô tơdroăng ki ối tung troăng pơkâ. Hiăng pêi klêi, ăm xúa 02 tơdroăng tơkêa, la krê troăng kân ƀă 09 tơdroăng tơkêa xŏn 475km, mơdêk tâi tâng ki xŏn dêi troăng kân ăm pro tung lâp tơnêi têa troh vâ chê 1.900 km.

A rôh hôp, mâu kăn teăng mâ mâu khu xiâm, kơvâ cheăng, kong pơlê, mâu khu mơdró kâ, khu tơrŭm hiăng tơpui tơno vâ mơnhên tối mâu tơdroăng ki hiăng pêi klêi, mâu tơdroăng tá hâi pêi klêi, mâu tơdroăng xơpá, tơvâ, tối ăm dêi rơpó mâu tơdroăng pêi ki tro ‘ló, túa pêi ki rơkê, tơƀrê tung tơbleăng hnoăng cheăng; vâ pơkâ mơ’no kum ăm kơvâ troăng prôk pơtối pêi klêi mâu tơdroăng pơkâ, hnoăng cheăng pơkâ mơ’no tung hơnăm 2024.