Tung kơxo lơ 1/12, Ngế pro xiâm hnê ngăn tơnêi têa Phạm Minh Chính tơdah Ngế xiâm ngăn ‘na mơngế pêi cheăng UAE ƀă Ngế xiâm ngăn Cheăng kâ UAE  Abdulla Bin Touq Al-Marri.  Klêi mê, Ngế pro xiâm hnê ngăn tơnêi têa veăng Leh pơxiâm po hneăng hôp mâu kăn xiâm pêi pro tơdroăng ‘na rak ngăn hyôh kong prâi tung lâp plâi tơnêi.

Kơxê hâi ki mê, Ngế pro xiâm hnê ngăn tơnêi pơkuâ tơdroăng hôp “Mơhnhôk tăng liăn ngân pêi pro tơdroăng tơhrâ dêi Việt Nam ‘na hơ’lêh hyôh kong prâi”, Rơtế ƀă Ngế pơkuâ xiâm tung lâp plâi tơnêi Standard Chartered Bank. Malối, Ngế pro xiâm hnê ngăn tơnêi ai ƀai pơchuât a hâi pơxiâm po hôp “Mơhnhôk tăng liăn ngân pêi pro tơdroăng tơhrâ dêi Việt Nam ‘na hơ’lêh hyôh kong prâi”; hlối veăng hôp tối tơbleăng a rôh Leh tơbleăng Pơkâ mơhnhôk tăng liăn (RMP) tơbleăng JETP.

Pakĭng mê, Ngế pro xiâm hnê ngăn tơnêi têa tối kô ai mâu tơdroăng pêi pro tơdrêng, mê cho trâm mâ Ngế pro xiâm hnê ngăn kong têa Ănglê, Kăn xiâm hnê ngăn EC ƀă Kăn xiâm pơkuâ kong têa Hungary.