A hneăng hôp tơpui ‘na xúa Kŏng ngê̆ dâi lĕm Việt Nam - Hà Lan, mâu kăn tơpui hên tơdroăng kal pơxá: Việt Nam rế mơnhông rơdêi tâ tung hnoăng cheăng xúa kơmăi kơmok ki dâi lĕm: mâ ngăn ing mâu khu mơdró tung lâp plâi tơnei; Tơbleăng ƀă hnê mơngế rơkê cheăng xúa kơmăi kơmok ki dâi lĕm Việt Nam; Troăng rơhlâ ƀă pâ thế...

Mơnhông mơdêk a kố, pôa Mark Rute, Ngế pro xiâm hnê ngăn kong têa Hà Lan ăm ‘nâi, tung hneăng lăm pôu Việt Nam dêi pôa rôh kố ai tá khu mơdró vâ chê 30 khu mơdró cheăng xúa kơmăi kơmok ki dâi lĕm má môi dêi Hà Lan troh, hên kŏng ti cheăng ƀă kơmăi kơmok ki dâi lĕm dêi Hà Lan pơxiâm ai mâu tơdroăng tơkêa ‘no liăn cheăng, hên khu mơdró ki ê dế tí tăng ‘nâi plĕng ƀă kô ‘no liăn, tơrŭm cheăng a Việt Nam.

Tối tơbleăng a Hneăng hôp tơpui ‘na cheăng kâ pê lo tơmeăm lĕm krúa, pôa Phạm Minh Chính - Ngế pro xiâm hnê ngăn tơnêi têa tối, mơnhông cheăng kâ pê lo tơmeăm lĕm krúa ƀă pêi cheăng krá kâk cho khuă ƀă cho troăng prôk ki khŏm thế pêi dêi mâu kong têa tung lâp plâi tơnêi.

Ngế pro xiâm hnê ngăn tơnêi têa khĕn kơdeăn hnoăng cheăng pêi ahdrối dêi Khu tơrŭm châu Âu (EU) tung tơdroăng mơdêk mơjiâng môi cheăng kâ lâp plâi tơnêi krúa lĕm ƀă pêi đi đo. Ngế pro xiâm hnê ngăn Chin phuh pơkâ thế mâu Khu xiâm, kơvâ cheăng kong pơlê ƀă mâu khu mơdró Việt Nam ƀă EU; tơhrâ kô đi đo kring vế hnoăng ki pơxúa tơxâng dêi mâu khu ‘no liăn cheăng ing kong têa ê mơhé vâ la lâi; đi đo rơtế ƀă Khu mơdró tơkâ luâ tơdroăng xơpá, pơloăng mơnúa, mơdoh chôu, tơ’lêi hlâu vâ vâi pú pêi cheăng tơniăn, ton hơnăm a Việt Nam ing tơdroăng “tâng ai pơxúa kô pơxúa tŭm péa, drêng trâm pá kô veăng hơlêm tŏng kum dêi rơpó”.