Veăng leh, pôa Lê Minh Hưng, Ngế pro xiâm hnê ngăn tơnêi têa phiu ro ƀă mơnê mâu vâi pú hiăng ai 80 hơnăm, 75 hơnăm ƀă 70 hơnăm ối tung Đảng. Ngế pro xiâm hnê ngăn tơnêi têa tối, kố ôh tá xê to mâu tơdroăng ki kơnía 'na hâi khế, mê cho troăng prôk ton xŏn dêi tơdroăng hriâm tâp, pleăng hnoăng cheăng ƀă hiâm mơno tơdrăng ƀă Đảng, ƀă Tơnêi têa, ƀă Kuăn pơlê.

Ngế pro xiâm hnê ngăn tơnêi têa tối, Hâi mơjiâng tơnêi têa lơ 2/9  cho hâi leh kân krip dêi hdrông mơngế; kố cho rôh rơtế hâk tơngăm hvái ngăn troăng prôk 81 hơnăm tơniăn krê, hơniâp lĕm, môi tuăn sap apoăng troh tá tui lui, mơjiâng, mơnhông tơnêi têa ƀă châ tơƀrê kân dêi tơdroăng cheăng kăch măng lối 96 hơnăm ing pơkuâ dêi Đảng. Tung troăng prôk mê hiăng hdró mâu tơdroăng ki pleăng mơheăm chhá, pleăng hnoăng cheăng dêi hên rơxông mơngế Việt Nam, ki rơhêng vâ tối cho mâu đảng viên ối cheăng tung Khu pơkuâ hnê ngăn Đảng hiăng ton hơnăm – mâu ngế hiăng rĕng ‘nâi klê troăng tơmiât, pêi pro dêi kăch măng, prôk tiô Đảng ing mâu hơnăm khế tơnêi têa ối hên pá puât, xahpá kân nah.  

Ngế pro xiâm hnê ngăn tơnêi têa púi vâ mâu đảng viên ƀă tơdroăng ki rơkê plĕng, tuăn ngôa rơkê ƀă tơdroăng ki loi tơngah dêi tơná, pơtối tơmâng ngăn, veăng tơpui tối tung hnoăng mơjiâng Đảng, mơjiâng khu kăn pơkuâ; hnê mơhriâm, mơhnhôk kuăn cháu; hnê pơchân ăm rơxông ối nếo hiâm mơno pâ nhuô̆m tơnêi têa, hiâm mơno mơ-eăm xêh, khên tơnôu, pôu râng hnoăng cheăng ƀă pơlê pơla ƀă púi vâ mơjiâng pơlê xiâm, tơnêi têa kro mơdrŏng rơdêi.