Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnhên tối, klêi kơ'nâi môi hơnăm pêi pro Pơkâ 71, ki hơ'lêh nhên má môi cho 'na ki hlê plĕng, luât pơkâ, troăng hơlâ, liăn ngân ƀă troăng hơlâ pơkuâ ngăn;  mơngế pêi cheăng ƀă troăng pơkâ, hên tíu ki ối tơvâ tơvân ton hơnăm rế hía rế châ lêi tah lôi.

Troăng hơlâ pơkâ ƀă thái cô, mơngế hriâm châ tơmâng ngăn tâ; hnê cheăng pêi ƀă hnê hriâm đăi hok ai pơ'lêh tiô troăng hơlâ tơdjêp ƀă khoa hok, kŏng ngê̆, pơ'lêh nếo tơmiât pêi rơkê ƀă tơdroăng kal vâ mơngế pêi cheăng.

Laga, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối mâu pơhlêh ‘na hnê hriâm, khu thái cô, ngế hriâm ƀă mâu ngế pêi cheăng tá hâi nhên khât. Tung la ngiâ kal pơhlêh ó rơdêi ing kêi đeăng pơkâ pêi, troăng hơlâ troh tơkŭm po pêi pro, mơjiâng tơdroăng ki châ tơƀrê inhên. Kơvâ hnê hriâm thế pơhlêh nếo păng ‘nâng ing pơkuâ hngêi trung, khu thái cô troh troăng hnê, hriâm, tơ’noăng ƀă mơnhên; kơdroh hriâm rơbot ƀai, hriâm ki vâ hnó, mơdêk mơ-eăm mơhriâm xêh, hriâm hlối pêi, châ tâ châ hlo, tơmiât krê xêh ƀă ai ivá tơpui ƀă pêi pro tro tơdroăng.