Kuô̆k hô̆i cho tíu mâu tơdroăng dêi tơdroăng rêh ối châ chêh tối, tơpui tơno ƀă pơhlêh chiâng troăng hơlâ, luât. Laga tơdroăng hơ’muăn pơtê a tíu hôp Kuô̆k hô̆i. Tơdroăng ki kuăn pơlê tơmâng hên tâ mê cho mâu troăng pơkâ mê hôm rĕng mot tung tơdroăng rêh ối, tah lôi tơdroăng pá puât ƀă mơjiâng mâu tơdroăng pơhlêh inhên lơ ôh.

Tơdroăng kố châ mơhno nhên a Hneăng hôp ôh tá tiah hmâ má Môi, Kuô̆k hô̆i hneăng má XVI nếo mơgêi klêi 17 hâi hôp, tơpui tơno, pêi cheăng. Kuô̆k hô̆i hiăng tơbleăng ăm pêi pro 15 luât, 6 tơdroăng xiâm tơbleăng a rôh hôp pơkâ luât, tơpui rôh apoăng bă 7 tơdroăng tơkêa bro luât ƀă pơkâ 7 tơdroăng xiâm tơbleăng a rôh hôp ki kal, vâ tơleăng mâu tơdroăng ki nếo ing nôkố, tah lôi tíu ki kreăng, mơjiâng pro tơ’lêi hlâu ăm kuăn pơlê, khu tê mơdró.

Tơtrŏng má môi, a hneăng hôp hiăng ai 2.680 rơkong tơpui a tôh ƀă 535 rơkong tơpui a hngêi hôp kân. Mâu kơxô̆ kố ăm hlo tíu hôp Kuô̆k hô̆i ôh tá klâ krê tơdroăng rêh ối, mê cho tíu tơkŭm, mơnhên ƀă tiâ tối mâu tơdroăng dế pơkâ ing tơdroăng ki ai khât nôkố.

Ing tíu ki ngăn mê, tơrŭm cheăng pơla Kuô̆k hô̆i ƀă kuăn pơlê ôh tá xê to trâm mâ, tơmâng hdrối ƀă kơ’nâi rêm hneăng hôp. Mê cho tơdroăng pêi pro đi đo: kuăn pơlê tiâ tối mâu tơdroăng pá puât, ôh tá teăm lơ ôh tá châ tiô pơkâ; kăn teăng mâ Kuô̆k hô̆i pơtroh rơkong tơpui mê a tíu Kuô̆k hô̆i hôp; Kuô̆k hô̆i pro ăm chiâng luât, tơdroăng xiâm tơbleăng a rôh hôp; kơ’nâi mê mâu kơ koan Tơnêi têa tơkŭm pêi pro ƀă kuăn pơlê pơtối séa ngăn, tiâ tối. Pôa Trần Thanh Mẫn, Kăn xiâm hnê ngăn Kuô̆k hô̆i tối nhên:

“Châ tơƀrê dêi hneăng hôp pơtối mơnhên ro hơniâp tiah hlo ƀă mâ dêi “Troăng pơkâ Đảng tơtro ƀă hiâm mơno kuăn pơlê’’, rơtế pêi pro păng ‘nâng, khŏm mơ-eăm kal kí hên dêi Kuô̆k hô̆i, Chin phuh, mâu kơ koan, kong pơlê ai tơdjâk tung tơdroăng hbrâ tơpui ƀă pêi pro tơdrêng mâu tơdroăng ki nếo ai nôkố, ôh tá lôi hrá, kreăng, ƀă ihiâm mơno pêi pro: hiăng tơpui cho pêi, pêi tơdrêng hlối, pêi tro, pêi châ tơƀrê’’.

Tơdroăng pơtâng hnê tối kố xuân pơkâ ƀă mâu kăn teăng mâ Kuô̆k hô̆i: ôh tá xê to tơmâng kuăn pơlê tơpui tối, mê tiô troh tá tui lui mâu tơdroăng ki kuăn pơlê pơkâ mơ’no. Xua môi troăng hơlâ lĕm bu păng ‘nâng ai kơnâ drêng kuăn pơlê tâ châ tơƀrê tung tơdroăng rêh ối. Xua mê, Kăn xiâm hnê ngăn Kuô̆k hô̆i pơkâ mâu kăn teăng mâ Kuô̆k hô̆i, kăn teăng mâ Kuô̆k hô̆i hbrâ séa ngăn, teăm tơdrêng pâ thế tah lôi mâu tơdroăng ối tơvâ, ôh tá teăm ing mâu tơdroăng ki nếo ai nôkố. Tơdrêng amê, mâu kơ koan pêi pro thế hbrâ, ôh tá tơkôm, trut, kơ’lĕng hvât ăm dêi pó, ôh tá lôi kuăn pơlê ƀă khu tê mơdró athế tơkôm.

Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, tơnêi têa pin dế mot hneăng “tơtêk rĕng, châ tơƀrê hôm luâ tơdroăng pơcháu’’, mâu troăng pơkâ châ tơbleăng ăm pêi pro a Hneăng hôp kố cho xiâm kối ki kal tiô luât vâ Chin phuh, mâu khu xiâm, kơvâ cheăng, kong pơlê pêi pro hnoăng cheăng tơdrêng tung mâu khế mơ’nui hơnăm 2026, mơ-eăm pêi kêi đeăng pơkâ tơtêk 2 kơxô̆ ƀă mâu pơkâ mơnhông hneăng hơnăm 2026 – 2030.

Kô chiâng vâ tối, ing tíu hôp Kuô̆k hô̆i troh tơdroăng rêh ối cho môi troăng prôk péa pâ. Kuăn pơlê pơtroh rơkong tơpui pói vâ dêi tơná troh Kuô̆k hô̆i; Kuô̆k hô̆i pơtroh mâu tơdroăng pói vâ tơxâng mê chiâng troăng pơkâ pêi; ƀă cho tơdroăng ki vêh rêh cho tíu séa ngăn ki dâi lĕm dêi mâu troăng pơkâ mê. Drêng troăng tơvó mê châ pêi pro hlâu lĕm, tơdroăng tơrŭm pơla Kuô̆k hô̆i ƀă kuăn pơlê kô ôh tá tot to a tơdroăng ki teăng mâ, mê chiâng tơdroăng rơtế prôk, séa ngăn ƀă rơtế mơjiâng mơnhông mơdêk.