Tiô pôa Lê Văn Tuấn, kuăn pơlê a thôn Bình Minh, hơnăm 2013, tung rôh ki chiâ tơnêi vâ pro trăng bo cheăng, mê rơpŏng hlo môi to kế tâ kơxêng ƀă hên kế tơmeăm. Pôa rơtế ƀă kuăn pơlê djâ kơxêng kiâ mố đô̆i mê vêh tâp a ilâng Nông trường Čư̆ Kbô. Tung plâ 13 hơnăm hdrối, rơpŏng pôa hmâ trâ văng mơgrúa lĕm, rak ngăn tơnâp kiâ ki mê.

Khế 8/2026, klêi kơ’nâi châ hnê tối ‘na “Cheăng pêi thâ 500 hâi măng”, pôa Tuấn hiăng tối tơbleăng tơdroăng mê ăm khu ki ai tơdjâk troh. Đô̆i K51 klêi mê hiăng rôu xo kơxêng kiâ mố đô̆i mê xuân ối lĕm môi tiah ton, rơtế ƀă hên mâu kế ki ê môi tiah kơdjiăn ếo, yêp kơxu, vŏng, kơxái paraxut ƀă ếo mêi mố đô̆i. Khu ki ai tơdjâk hiăng xo túa vâ séa ngăn ADN. Kơxêng kiâ dế châ rak, tơkôm tơbâ hnoăng ƀă tâp ‘mế.