Sap apoăng hơnăm 2023 troh nôkố lâp tơnêi têa ai vâ chê 3 rơpâu roh on chếo ƀă tơdroăng ki chếo, pro hlâ 134 ngế, pro tro rong 101 ngế, ‘na kế tơmeăm khoăng tiô riân apoăng vâ chê 230 rơtal liăn. Mơgêi hneăng hôp, pôa Phạm Minh Chính, Ngế pro xiâm hnê ngăn tơnêi têa kheăn kơdeăn tơdroăng mơ-eăm, tơdroăng châ tơƀrê ki mâu khu xiâm, kơvâ cheăng, kong pơlê, mâu khu cheăng hiăng châ tung tơdroăng pêi cheăng hbrâ tơpâ mơdât on chếo ƀă tŏng xo mơngế hliăng tiâ tung pơla kố nah, hiăng veăng kum mơjiâng tíu gâk kring, tơniăn lĕm, rak tơniăn tung tơdroăng rêh ối.

Tơdrêng amê, Ngế pro xiâm hnê ngăn tơnêi têa pơkâ kal kơtăng hvái ngăn tơdroăng pêi cheăng hbrâ tơpâ mơdât on chếo ƀă tŏng xo mơngế hliăng tiâ, ối hên tơdroăng ki ối tơvâ tơvân, pá puât kal thâ, kơtăng rak pro tơniăn. Ngế pro xiâm hnê ngăn tơnêi têa tối nhên, tơdroăng khu râ kăn pơkuâ, hnê mơhno, pêi pro tơdroăng hbrâ tơpâ mơdât on chếo ƀă tŏng xo mơngế hliăng tiâ châ tơƀrê.

Ngế pro xiâm hnê ngăn tơnêi têa pơkâ mâu Ngế xiâm, Kăn pơkuâ kơ koan râ xiâm, Kăn hnê ngăn Vi ƀan mâu kong pơlê, pơlê kong kơdrâm pơkâ pro kơtăng xo vế túa ki rơkê tơtro, pơ’lêh tung pơkuâ, hnê mơhno tơdroăng hbrâ tơpâ mơdât on chếo ƀă tŏng xo mơngế hliăng tiâ.