Mơ-éa ki kal tối nhên: Tiô tơbleăng rĕng dêi Vi ƀan rak tơniăn troăng klông ƀă rơxế kơtâu tơnêi têa, a 2 chôu 10 phut hâi lơ 31 khế 10 hơnăm 2023, a km 70+800 Troăng kân tơnêi têa 1A ối tung rơnâk kong Rừng Cấm, tơring Hữu Lũng, kong pơlê Lạng Sơn hiăng ai roh tơklâm rơxế ki râ ó pơla rơxế ô tô pơto tơmối 16 tíu ‘nâng krâ kơxô̆ 14B-03657 ƀă tơklâm ƀă rơxế sơ mi rơ-moóc ƀă rơxế container kơtâu tơrôu; roh tơklâm pro 05 ngế hlâ ƀă hên ngế tro rong, 3 rơxế ôtô tơ’nhê ó.

Klêi kơ’nâi tơdah tơdroăng roh tơklâm, Ngế pro xiâm hnê ngăn Chin phuh hiăng hnê mơhno pơtroh rơkong kơ-êng, hơlêm trâu hơngế troh nhŏng o, rơpŏng mâu ngế ki hlâ, mơhnhôk, kơ-êng mâu ngế ki tro rong roh tơklâm; tơdrêng amê xing xoăng tơdroăng cheăng ăm kăn phŏ hnê ngăn Pơkuâ Vi ƀan rak tơniăn troăng klông Tơnêi têa rơtế mâu khu pú teăng mâ Khu xiâm pơkuâ Kŏng an, Khu xiâm pơkuâ troăng prôk ƀă rơxế kơtâu troh ngăn amê vâ tơrŭm ƀă Vi ƀan kong pơlê Lạng Sơn ƀă mâu kơ koan ai tơdjâk hnê mơhno pro tơniăn tơdroăng tơklâm rơxế ƀă kơ-êng mâu ngế tung roh tơklâm; tơkŭm khu cheăng pơlât mâu ngế tro rong; tơkŭm kơ-êng, tŏng kum teăm tơdrêng, mơhnhôk mâu rơpŏng mơngế hlâ ƀă mâu ngế tro rong tung roh tơklâm rơxế.