Xông tơpui a roh pêi cheăng, pôa Phạm Minh Chính, Ngế pro xiâm hnê ngăn tơnêi têa tối, mâu tơdroăng tơkêa bro tá hâi pêi pro cho hên ƀă ton plâ hơnăm kố, tung pơla pơhlêh pơkâ pêi plah tơtêk mơ-eăm lối 8% tung hơnăm kố ƀă péa kơxô̆ a mâu hơnăm pơtối mê pơkâ thế khŏm mơ-eăm hên, mơ-eăm kân, tung mê, pêi kêi đeăng mâu tơdroăng ki u ối tá hâi pêi klêi, ôh tá dâi. Ngế pro xiâm hnê ngăn tơnêi têa tối, Khu xiâm pơkuâ liăn ngân hiăng mơjiâng inâi, rah klâ tiô túa lối 1 rơpâu 500 mâu tơdroăng tơkêa bro pá puât, tơvâ tơvân, laga, ki dâi lĕm tơbleăng ôh tá tơdâng tơ’mô.

Ngế pro xiâm hnê ngăn tơnêi têa pơkâ thế tơdroăng ki tơleăng tơvâ tơvân ƀă thế mơ-eăm têi, mơ-eăm kân, pêi kơtăng, tro tơdroăng, tro xiâm kối. Pơtối séa ngăn, mơjiâng troăng pêi, túa pêi tơleăng hdrối 1 khu tơdroăng tung mê ai kơjo rah xo khu mâu tơdroăng tơkêa bro mơ’no liăn cheăng tơnêi têa, tơdroăng tơkêa bro tiô troăng PPP (tơkêa pơla tơnêi têa ƀă khu tê mơdró vâ pêi pro tơdroăng tơkêa bro).