Tiô rơkong krếo thế dêi Chin phuh mâu kong têa Arab thống nhất  (UAE) ƀă Chin phuh kong têa Thổ Nhĩ Kỳ, kơxê hâi lơ 28/11 Ngế pro xiâm hnê ngăn tơnêi têa  Phạm Minh Chính ƀă kơdrâi pôa rơtế ƀă mâu kăn xiâm Việt Nam hiăng lăm veăng hôp Kân tơpui tơdroăng ‘na hyôh kong prâi tung lâp plâi tơnêi tung  rôh po hneăng hôp má 28 rêm pâ  ki veăng hôp Tơhrâ ‘na tơdroăng pơkâ dêi khu lâp kong têa ‘na hyôh kong prâi hơ’lêh (COP28) , pêi mâu tơdroăng cheăng pơla péa pâ  a UAE vâ lăm pôu Thổ Nhĩ Kỳ sap hâi lơ 29/11 troh hâi lơ 3/12/2023.

Hneăng hôp kân COP28 cho hneăng hôp tơpui hên tơdroăng ki kal tung hơmăn ‘na hyôh kong prâi hơ’lêh. Hneăng hôp kân tiô tối hdrối kô veăng ai lối 70  rơpâu ngế kăn teăng mâ lo ing 197 to kong têa, EU ƀă rơpâu khu tơrŭm cheăng  pá gong chin phuh, khu mơdró, khu ngăn droh rơtăm ƀă rêm pâ ki ai tơdjâk troh. Malối,  cho ai mâ lối 100 ngế kăn xiâm, mâu Ngế pro xiâm hnê ngăn chin phuh mâu kong têa ƀă mâu kăn pơkuâ mâu khu tơrŭm  cheăng lâp plâi tơnêi.

Ngế pro xiâm hnê ngăn tơnêi têa  Phạm Minh Chính veăng hôp mâu kăn xiâm Tơpu tơdroăng pêi pro ‘na hyôh kong prâi tung lâp plâi tơnêi cho rôh vâ Việt Nam mơhno ki rơdêi tơdroăng cheăng pêi tơná, hbrâ rơnáu pêi, kơhnâ veăng tơleăng mơnhên mâu tơdroăng pơloăng mơnúa  tơdjuôm tung lâp plâi tơnêi ‘na hyôh kong prâi hơ’lêh; kum mâu kong têa tung lâp plâi tơnêi hlê nhên troăng rơhlâ, ki mơ-eăm xuân môi tiah mâu tơdroăng xơpá, pơloăng mơnúa dêi Việt Nam tung tơdroăng hbrâ ví hyôh kong prâi hơ’lêh.