Trâm mâ giảng viên, sinh viên Hngêi trung Đăi hok Ngoăi thương, Ngế pro xiâm hnê ngăn tơnêi têa Phạm Minh Chính rơrêk tung hiâm mơno tơbâ khôi túa vâi krâ nah rŭm môi tuăn, tơrŭm, mơnhông mơdêk pơla péa Đảng, péa Tơnêi têa; Ngế pro xiâm hnê ngăn Chin phuh Phạm Minh Chính pói vâ, ƀă khôi túa vâi krâ nah ki ai hnoăng nah khoh chiâng niân nôkố, rơxông hơnăm ối nếo péa tơnêi têa kal troh tá ah pâ vế ƀă mơnê trâu hơngế hnoăng kân kĭn dêi mâu rơxông kăn pơkuâ ƀă kuăn pơlê péa tơnêi têa.

Klăng roh kố, Ngế pro xiâm hnê ngăn tơnêi têa Phạm Minh Chính tối mơnê Chin phuh ƀă kuăn pơlê Kul hiăng đi đo loi tơngah, rah xo Việt Nam cho môi tung mâu tíu troh, khu tơrŭm má môi tung tơdroăng hnê mơjiâng, mơdêk ki rơkê mơngế pêi cheăng dêi kong têa Kul. Ngế pro xiâm hnê ngăn tơnêi têa pói vâ Hngêi trung Đăi hok Ngoăi thương đi đo kơdo mơ-eăm, thăm veăng pơtroh mơngế pêi cheăng rơkê ăm mâu kơ koan tơnêi têa ƀă khu tê mơdró kum tung mâu tơdroăng cheăng kâ tơpui kâ ƀă kong têa ê, pro tơ’lêi hlâu má môi ‘na hriâm tâp, hriăn plĕng, ‘na tíu kâ tíu ối ăm mâu pú hmâ hok tro, sinh viên kong têa Kul.