Xông tơpui a roh pêi cheăng, teăng mâ khu râ kăn pơkuâ Chin phuh, Ngế pro xiâm hnê ngăn tơnêi têa Phạm Minh Chính rơkâu, kheăn kơdeăn tơdroăng mơ-eăm ƀă châ tơƀrê dêi kăn ƀô̆, giảng viên, ngế hriâm, ngế pêi cheăng, mô đô̆i Hok viê̆n Kuô̆k phong mâu hơnăm hiăng hluâ.

Ngế pro xiâm hnê ngăn tơnêi têa pơkâ thế Hok viê̆n Kuô̆k phong thế pêi lĕm tro hnoăng cheăng hnê mơjiâng; hriăn plĕng, mơgêi, ôh tá xê to mâu tơdroăng hriâm tơdjâk cheăng lêng mê thế tâi tâng; vâ hriăn plĕng lĕm tro tâ thế tơkŭm mâu tơdroăng kal, ing mê nếo ai tơmiât, troăng pêi tro, troăng châ achê tro; tơrŭm krá tơniăn ƀă mâu tíu cheăng vâ kêi đeăng hnoăng cheăng tung tơdroăng lâp plâi tơnêi pơ’lêh đi đo, hên tơdroăng hluâ ivá tối hdrối.