Tơpui tơno ƀă Ngế pro xiâm hnê ngăn tơnêi têa Phạm Minh Chính, Ƀok xối pơkuâ kơpong khôp Juse Nguyễn Văn Phong (Tơring khôp Bắc Giang) tối ăm ‘nâi, tung péa hơnăm hiăng hluâ, kơpong khôp Bắc Giang ai tơdroăng rêh ối, cheăng kâ lĕm tơniăn, kuăn pơlê tối tơdjuôm, kuăn khôp Pâ Xeăng tối krê phiu ro xua tơdroăng rêh ối hiăng châ tơtêk hên ‘na kế tơmeăm khoăng, mơnhông ‘na hiâm mơno rế hía rế châ pơ’lêh, ki rơhêng vâ tối châ tơdah Ngế pro xiâm hnê ngăn Chin phuh troh rơkâu Hâi tĭng kân Pâ Xeăng chu chiâng kuăn mơngế 2023.

Xông tơpui a roh kố, Ngế pro xiâm hnê ngăn tơnêi têa Phạm Minh Chính tối nhên, Đảng, Tơnêi têa đi đo nhuô̆m tơdroăng loi tĭng - tiô khôp dêi kuăn pơlê, tung mê ai tơdroăng khôp Pâ Xeăng. Ngế pro xiâm hnê ngăn tơnêi têa tối nhên, Bắc Giang cho kong pơlê trâm hên pá puât drêng pơreăng COVID-19 xông tâ tú nah, laga, kong pơlê hiăng kâi châ mơdât, rak rêh ối tơniăn ƀă mơnhông tơdroăng cheăng kâ tơtêk rĕng. Tơdroăng phiu ro Hâi tĭng kân Pâ Xeăng chu chiâng kuăn mơngế dêi Tơring khôp phiu ro; pói vâ ing pơkuâ dêi Đảng, Tơnêi têa, kuăn pơlê mơ-eăm pêi lĕm tro troăng prôk dêi Đảng, troăng hơlâ luât dêi Tơnêi têa. Ngế pro xiâm hnê ngăn tơnêi têa Phạm Minh Chính rơkâu Kuăn khôp Pâ Xeăng Bắc Giang môi Măng tĭng kân Pâ Xeăng chu chiâng kuăn mơngế mo châ, hơniâp lĕm, môi hơnăm nếo tơniăn ro, sôk suâ.