Tung mâu hơnăm hiăng hluâ, Hô̆i đong mơdêk tơpui kâ ƀă kong têa ê kuăn pơlê kong têa Nhuk hiăng ai hên tơdroăng pêi, châ tơƀrê, kum mơdêk tơrŭm cheăng nhŏng o ƀă tơrŭm hên troăng pơla Việt Nam ƀă Nhuk môi tiah: Pơtroh mâu khu séa ngăn cheăng kâ, hnê hriâm, khôi túa lĕm tro lăm pôu Việt Nam; tơkŭm po mâu tơdroăng mơhnhôk mơ’no liăn cheăng – tê mơdró pơla péa tơnêi têa; tŏng kum mơjiâng mơngế pêi cheăng ăm Việt Nam; trâm mâ ƀă tơpui tơno ƀă mâu khu râ kăn ing Việt Nam lăm pôu Nhuk; thăm tŏng kum mâu tơdroăng pêi dêi Kăn teăng mâ Việt Nam a kong têa Nhuk.

Tung la ngiâ, Ngế pro xiâm hnê ngăn tơnêi têa Phạm Minh Chính tối péa pâ kal pơtối hnê hriâm ăm rơxông ối nếo péa tơnêi têa đi đo rak ƀă mơnhông tuăn pâ nhŏng o cho kế tơmeăm ki kơnâ pơla péa hdroâng mơngế; mơnhông mâu tơdroăng hiăng chiâng pêi, xo vế túa ki rơkê tơtro ing mâu tơdroăng tá hâi chiâng pêi pro; ki nhên tơrŭm cheăng ton xŏn tâi tâng mâu tơdroăng pêi, tơdroăng pêi ki nhên, djâ tơrŭm cheăng péa tơnêi têa rế hía rế prôk trâu hơngế, păng ‘nâng, châ tơƀrê tâ.