Ngế pro xiâm hnê ngăn tơnêi têa Phạm Minh Chính pêi cheăng ƀă Khu pơkuâ hnê ngăn cheăng Đảng kong pơlê Lai Châu
Thứ hai, 13:59, 20/11/2023
Tơplôu: A Sa Ly/VOV
Tơplôu: A Sa Ly/VOV
VOV4.Xơ Đăng - Kơxo lơ 19/11, Ngế pro xiâm hnê ngăn tơnêi têa Phạm Minh Chính pêi cheăng ƀă Khu pơkuâ hnê mơhno cheăng Đảng kong pơlê Lai Châu ‘na tơdroăng pêi pro mâu hnoăng cheăng mơnhông cheăng kâ – rêh ối pơlê pơla sap apoăng hneăng hôp Đảng ƀô̆ kong pơlê roh má XIV troh nôkố ƀă pơkâ troăng prôk la ngiâ, hnoăng cheăng tung la ngiâ; tơleăng mâu tơdroăng pơkâ thế dêi kong pơlê.
Klêi kơ’nâi tơmâng mâu rơkong tơpui dêi kong pơlê ƀă khu râ kăn pơkuâ mâu Khu xiâm, kơvâ cheăng, xông tơpui a roh pêi cheăng, Ngế pro xiâm hnê ngăn tơnêi têa Phạm Minh Chính kheăn kơdeăn tơdroăng mơ-eăm ƀă tơdroăng châ tơƀrê châ Đảng ƀô̆, khu râ kăn pơkuâ, khu lêng ƀă kuăn pơlê kong pơlê Lai Châu, kum tung tơdroăng châ tơƀrê tơdjuôm dêi lâp tơnêi têa.
Tung la ngiâ, Ngế pro xiâm hnê ngăn tơnêi têa pơkâ thế, kong pơlê kal pơtối hlê plĕng pêi pro, pêi inhên Pơkâ Hneăng hôp má XIII dêi Đảng; po rơdâ pêi pro châ tơƀrê pơkâ, hnoăng cheăng mơ’no tung Pơkâ 5 hơnăm, Troăng pêi ton xŏn 10 hơnăm ƀă Pơkâ Hneăng hôp Đảng ƀô̆ kong pơlê roh má 14.
Viết bình luận