Xông tơpui a hneăng hôp, Ngế pro xiâm hnê ngăn tơnêi têa Phạm Minh Chính kheăn kơdeăn păng ‘nâng ƀă tá hiâm mơno kheăn kơdeăn mâu tơdroăng mơ-eăm ƀă tơdroăng châ tơƀrê dêi mâu râ kơvâ cheăng, ki má lối cho hnoăng cheăng xiâm dêi khu Kŏng an kuăn pơlê, tơdroăng ki veăng, tơrŭm krá tơniăn dêi khu xiâm, kơvâ cheăng, kong pơlê; tơdroăng mơ-eăm, tơdjuôm môi hiâm mơno, tơdjuôm ivá rơtế, veăng châ tơƀrê dêi khu tê mơdró kŏng ngê̆; tơdroăng môi hiâm mơno, tŏng kum, môi tuăn, veăng dêi kuăn pơlê, khu tê mơdró.

Tung la ngiâ, Ngế pro xiâm hnê ngăn tơnêi têa tối nhên khu hnoăng cheăng ki xiâm, tung mê tối nhên tơdroăng pêi pro mâu hnoăng cheăng thâ sap ing kố troh Têt Lo hơnăm nếo Nguyên đán Giáp Thìn 2024. Ki rơhêng vâ tối, ‘na mơhá liăn rêh ối pơlê pơla, Ngế pro xiâm hnê ngăn tơnêi têa pơkâ thế Kăn hnê ngăn Vi ƀan kuăn pơlê 12 kong pơlê rĕng pêi pro mơhá liăn rêh ối pơlê pơla ing troăng ôh tá xúa liăn a ngâ.

Ngế pro xiâm hnê ngăn tơnêi têa pơkâ, Khu xiâm pơkuâ hnê arak luât tơrŭm ƀă Khu xiâm pơkuâ Kŏng an pêi pro xing xoăng phĭu lĭ lĭch tung phân mêm VNeID a Thừa Thuên Huế tung pái khế apoăng hơnăm 2024 vâ kêi đeăng rơdâ tung lâp tơnêi têa.