Hneăng hôp châ mơ’no tơdrêng tiô troăng hyôh tung lâp tơnêi têa a tíu mơ’no xiâm dêi Chin phuh ƀă tíu mơ’no a mâu Tíu pêi cheăng xiâm, kơ koan tơdâng khu xiâm dêi Chin phuh, Vi ƀan mâu kong pơlê, pơlê kong kân râ xiâm tơnêi têa. Hơnăm 2023, pơ’lêh kơxô̆ dêi tơnêi têa châ mơdêk rơdêi tiô troăng rơhlâ tâi tâng, tŭng tŭm tơdroăng, ai pơxúa, veăng ‘no hnoăng a mơnhông cheăng kâ rêh ối dêi tơnêi têa.

Hơnăm châ 'mot hên mâu tơdroăng cheăng kơmăi dêi tơnêi têa, pin hiăng pro xiâm ƀă tối tơbleăng mâu tơdroăng chêh ‘mot tung kơmăi tung kơ koan tơnêi têa, pro xiâm mơnhông tơƀrê túm tá 3 tơdroăng ki xiâm Chin phuh kơxô̆, cheăng kâ, rêh ối pơlê pơla. Kơlo Hơ’lêh nếo hriăn plĕng ki nếo dêi Việt Nam hơnăm 2023 ối má 46/132, tâk 3 râ tâng vâ pơchông ƀă hơnăm 2022.

Tơbleăng a hneăng hôp, Ngế pro xiâm hnê ngăn Chin phuh Phạm Minh Chính tối, pơ’lêh kơxô̆ dêi tơnêi têa hơnăm 2023 châ mơdêk rơdêi tiô troăng tâi tâng, tŭm tơdroăng, ai pơxúa, veăng ‘no hnoăng mơnhông cheăng kâ rêh ối dêi tơnêi têa, ƀă 6 tơdroăng hiăng pêi pro ki xiâm.

Ngế  pro xiâm hnê ngăn Chin phuh hnê tối ‘na tơdroăng hơ'lêh kơxô̆: Thế đi đo tơmiât pơ’lêh nếo, tuăn tơmiât thế hlê, mơ-eăm thế kân, mơ-eăm thế rơkê, pêi pro thế kơtăng ƀă troăng rơhlâ khoa hok, ai pơxúa. Mơnhông cheăng tơnêi têa tŭm tâi tâng, hmâ iâ la thế pêi lĕm krá hlối krúa.