Pơkâ dêi kơvâ cheăng ôm hyô tơnêi têa pin ta troh hơnăm 2025 ah ki iâ gá tơdah châ  35 hdrôh ngế tơmối lâp plâi tơnêi ƀă 120 hdrôh ngế tơmối tung tơnêi têa, troh hơnăm 2030 tơdah châ 50 hdrôh ngế tơmối lâp plâi tơnêi, 160 hdrôh ngế tơmối tung tơnêi têa. Vâ pê klêi mâu tơdroăng pơkâ mê, tiô Ngế pro xiâm hnê ngăn, kơvâ ngăn Ôm hyô kal pơ’lêh nếo tuăn tơmiêt , túa pêi cheăng ƀă mâu tơdroăng pêi pro hriĕn plĕng , tơ ƀrê, tơdâng, pơxúa; pêi pro “ tơrŭm krá khât, tơrŭm pơla tơtro ƀă dêi rơpó, tơrŭm tung tŭm tơdroăng cheăng’’.

Ngế pro xiâm hnê ngăn tơnêi têa pơkâ thế hneăng Hôp tơpui tơno, tơpui vâ tăng rơkong tơpui ki vâ pêi châ tơ ƀrê mâu tơdroăng cheăng tung iâ hơnăm, ton hơnăm; tăng mâu tơdroăng tiâ mâu tơdroăng ki kal vâ kơvâ ôm hyô mơnhông mơdêk rĕng ƀă krá tơniăn ton. Ngế pro xiâm hnê ngăn tơnêi têa pơkâ thế  tơkŭm tối nhên kal pơkâ mâu luât tŏng kum ki klâi vâ mơdêk tơrŭm mơnhông ôm hyô, mơdêk ki tơ ƀrê tơdroăng tăng liăn ƀă xúa mơngế pêi cheăng; Kal ai luât pơkâ ki lâi vâ mơhnhôk, pro tơ’lêi hlâu mơnhông ôm hyô; Troăng rơhlâ ki lâi vâ rế ai hên ngế lăm ôm hyô, malối mâu ngế  cheăng ôm hyô ki pơxúa tơ ƀrê.