Tiô tơdroăng roh lăm pôu, Ngế pro xiâm hnê ngăn tơnêi têa Phạm Minh Chính pơkuâ leh tơdah păng ‘nâng Ngế pro xiâm hnê ngăn kong têa Lếo ƀă kơdrâi pôa a Tíu pêi cheăng Kăn xiâm hnê ngăn tơnêi têa; kơ’nâi mê 2 Ngế xiâm pơkuâ djâ khu râ kăn xiâm 2 Chin phuh tơkŭm tơpui tơno a tíu pêi cheăng Kăn xiâm hnê ngăn Chinh phuh; châ hlo Leh kĭ tơkêa mơ-éa tơrŭm cheăng pơla mâu khu xiâm, kong pơlê péa tơnêi têa.

Tung roh lăm pôu pêi cheăng kố, Ngế pro xiâm hnê ngăn kong têa Lếo rơtế ƀă Ngế pro xiâm hnê ngăn tơnêi têa Phạm Minh Chính rơtế pơkuâ Hneăng hôp roh má 46 Vi ƀan Chin phuh Việt Nam – Lếo. Kăn xiâm hnê ngăn tơnêi têa Võ Văn Thưởng, Kăn xiâm hnê ngăn Kuô̆k hô̆i Vương Đình Huệ kô tơdah Ngế pro xiâm hnê ngăn kong têa Lếo Sonexay Siphandone.

Roh lăm pôu pêi cheăng păng ‘nâng a Việt Nam dêi Ngế pro xiâm hnê ngăn tơnêi têa Sonexay Siphandone ƀă kơdrâi pôa tơkŭm po tung pơla péa tơnêi têa pơtối tơrŭm ƀă mơnhông lĕm tro. Tơrŭm cheăng kal kí châ krá tơniăn, loi tơngah dêi pó rế hía rế tâk, rak hnoăng ki xiâm, mơnhên troăng prôk la ngiâ tâi tâng tơrŭm pơla péa tơnêi têa.