Mâu hlá mơéa pơchuât tơbleăng a rôh hôp ăm ‘nâi, tung 11 khế hơnăm kố, kơxô̆ liăn ‘no pêi cheăng tơdjuôm lâp tơnêi têa châ dâng 461 rơpâu rơtal liăn, châ 65,1%, hên tâ lối 6,77% tâng pơchông ƀă khế kố ƀă hên tâ tâng pơchông ƀă khế kố lối 122,6 rơpâu rơtal. Maluâ kơxô̆ liăn ‘no pêi cheăng tơdjuôm lâp tơnêi têa hên tâ tâng pơchông ƀă hơnăm 2022, la nôkố ối ai 41 khu xiâm, kơ koan Tơnêi têa ƀă 24 to kong pơlê ai kơxô̆ liăn ‘no iâ tâ kơlo pơkâ dêi lâp tơnêi têa.

A Rôh hôp, kăn pơkuâ Chin phuh ƀă mâu khu xiâm kơvâ cheăng, kong pơlê tối, tơdroăng ki ‘no liăn pêi cheăng tơdjuôm hrá xua ai mâu tơdroăng môi tiah: xơpá ‘na hnoăng cheăng chêl thiê̆n tơnêi; hlá mơéa chêh pro ‘no liăn cheăng ối tơvâ tơvân; ai mâu tơdroăng pơkâ luât tá hâi tơtro, bô bối nếo châ ‘mâi rơnêu ƀă hên ki ê. Klêi kơ’nâi mơgêi Rôh hôp, Ngế pro xiâm hnê ngăn tơnêi têa Phạm Minh Chính tối kơtăng khât mâu kơ koan, kong pơlê ai kơxô̆ liăn ‘no pêi cheăng iâ; pơkâ thế mâu kơ koan, kong pơlê pêi pro kơtăng séa ngăn khât, tung tơdroăng mê athế pêi pro kơtăng tơbleăng mâu troăng hơlâ vâ hơ’lêh ‘no liăn cheăng tơdjuôm a kơ koan, kong pơlê tơná pơkuâ rĕng ƀă tơƀrê.