A roh hôp mâu khu tơrŭm cheăng Chin phuh tơpui tơno, séa ngăn, tơpui ƀă 9 tơdroăng xiâm ai 7 pơkâ mơjiâng luât, tơdroăng luât ƀă 2 tơdroăng tơkêa bro luât. Mơgêi a roh tơpui tơno, Ngế pro xiâm hnê ngăn tơnêi têa Phạm Minh Chính tối nhên, 9 tơdroăng xiâm tơpui tối a roh hôp kố cho troăng hbrâ ki kal ăm Tơdroăng mơjiâng luât, tơdroăng luât, mâu tơdroăng tơkêa bro Luât; pêi kơtăng tơmâng xo, tiâ tối nhên, ai xiâm kối.

Ngế pro xiâm hnê ngăn tơnêi têa kheăn kơdeăn rơkong tơpui tá hiâm mơno, pôu râng hnoăng cheăng, tơtro ƀă tơdroăng nôkố ƀă hiâm mơno mơjiâng dêi mâu Kăn cheăng tung Chin phuh ƀă pơkâ mâu Ngế xiâm hnê mơhno tơmâng xo kơtăng, tŭm rơkong tơpui dêi Khu râ kăn Chin phuh. Pêi kêi đeăng mâu pơkâ mơjiâng luât tiô pơkâ.