Klêi kơ’nâi tơmâng mâu rơkong tơpui tham luâ̆n dêi khu râ kăn pơkuâ mâu khu xiâm kơvâ cheăng kong pơlê, Ngế pro xiâm hnê ngăn tơnêi têa Phạm Minh Chính mơnhên, kheăn kơdeăn, mơnhên mâu tơdroăng mơ-eăm tâi ivá, ƀă tơdroăng châ tơƀrê dêi mâu khu xiâm, kơvâ cheăng, kong pơlê; tơdroăng hnê mơhno kơtăng dêi khu tơrŭm cheăng Khu hnê mơhno pơhlêh pro mơ-éa tung pơla kố nah; ai hên tơdroăng veăng kum, kal khât tung tơdroăng châ tơƀrê tơdjuôm dêi lâp tơnêi têa.

Ngế pro xiâm hnê ngăn tơnêi têa pơkâ thế, mâu khu xiâm, kơvâ cheăng, kong pơlê pơtối séa ngăn, pơhlêh nếo troăng prôk, troăng pêi ƀă mơnhông hnoăng, pôu râng hnoăng dêi ngế ối a ko vâ tơkŭm po pêi pro châ tơƀrê hnoăng cheăng pơhlêh pro mơ-éa châ pơcháu.

Khu râ kăn pơkuâ khu xiâm, kơvâ cheăng, kong pơlê thăm tơpui tơno vâ tơdrêng amê ‘nâi tơdroăng nôkố ƀă hnê mơhno tah lôi mâu tơdroăng pá puât, tơvâ tơvân ăm kuăn pơlê, khu tê mơdró; thâ kêi đeăng, tơbleăng kơ koan ai hnoăng tơbleăng mơ-éa pơkâ nhên luât, luât pơkâ, pơkâ pêi pro hiăng xêt khât dêi luât.