Kơxô̆ mơngế hlâ ƀă tro rong xua tơnêi rơlâm tơhnâp ó pơtối tâk. Tơdrêng ƀă tơnêi tơhnâp têi 7,6 độ rich ter; 155 rôh tơnêi tơdro hiăng pro lŭp kân ‘na kơphô̆ ƀă pro hên rôh on chếo a pơlê kong kân Wajima, kong pơlê Ishikawa.

Tơbleăng a rôh hôp tơdrêng ƀă khu chêh hlá tơbeăng po tung hâi ki mê, Ngế pro xiâm hnê ngăn kong têa Nhuk Kishida Fumio tối, ki lŭp xua tơnêi tơdro tơhnâp pro “cho  a rôh ki kân têi”, Chin phuh kong têa kố kô mơ-eăm rĕng pêi mâu tơdroăng cheăng tŏng kum ƀă tŏng xo mơngế ki ối kreăng, mơngế hliăng tiâ, ing mê mơhnhôk tá mâu lêng, hlối rah thế mâu kăn rêm khu xiâm, kơ koan tơdjâk troh lăm troh a tíu tơnêi tơhnâp vâ kum chơ djâ tơmeăm kuăn pơlê ƀă pêi pro tơdroăng tŏng kum ki ê.