Pŭn tơdroăng tơkêa bro ‘no liăn pro lối 15 rơtal liăn, châ hên khu tơrŭm mơjiâng pro hiăng klêi hâi lơ 24/12 a 4 tíu mơ’no tung rơ’jíu: Pơlê kong kơdrâm Điện Biên, Tuyên Quang, Tiền Giang ƀă Vĩnh Long.

Kố cho mâu troăng prôk ki kal châ leh hiăng pro klêi tung hơnăm 2023 ƀă pêi pro tro tiô pơkâ. Tơdroăng ki kal 2 tơdroăng tơkêa pro mê tơbleăng pêi hiăng pê klêi, hiăng pêi tro tiô troăng rơhlâ dêi râ kong pơlê, mơhnhôk tăng liăn ing pá kong hngêi rak liăn tơnêi têa.

Tơbleăng a rôh leh, Ngế pro xiâm, hnê ngăn Phạm Minh Chính tối, tơmâng xo ƀă khĕn kơdeăn tơdroăng ki mơ-eăm, ai hnoăng pêi tro dêi khu xiâm ngăn troăng prôk rơxế kơtâu, mâu kong pơlê, pơlê kong kân châ pơcháu pêi tơdroăng tơkêa bro, tối nhên, sap ing tơdroăng hiăng châ pêi tơƀrê ai pơxúa mâu tơmeăm khoăng hiăng  po leh, ‘mâi mơnhông tơ’nôm mâu túa pêi ki kal tung pêi pro mâu pơkâ mơnhông cheăng kâ - rêh ối.

Ngế pro xiâm hnê ngăn tơnêi têa tối pơchân, rêm ngế ki veăng pêi tơdroăng tơkêa bro thế mơdêk hlê plĕng  ƀă hnoăng cheăng tơná pêi, ƀă kơvâ cheăng hên; hơ’lêh nếo tuăn tơmiât, túa pêi cheăng vâ pê klêi tro tiô pơkâ tơdroăng cheăng ki tơbleăng pêi.