Tơdroăng tối troh Kăn xiâm hnê ngăn Kuô̆k hô̆i Bulgaria ƀă  tơdroăng mơjiâng tơnêi têa, troăng tơpui kâ, luât pơkâ ‘na lêng, ‘na mâu tơdroăng hiăng mơnhông tơƀrê cheăng kâ - rêh ối dêi Việt Nam.  Ngế pro xiâm hnê ngăn tơnêi têa Phạm Minh Chính tối tiah kố, péa pâ kal thế tơrŭm cheăng ƀă  púi vâ rế ton rế ai hên mâu khu mơdró, khu ‘no liăn cheăng dêi Việt Nam ƀă Bulgaria ‘no liăn chăng a rêm pâ.

Ngế pro xiâm hnê ngăn tơnêi têa Phạm Minh Chính pâ thế péa pâ mơnhen tơdroăng tơrŭm cheăng kâ cho xiâm ki kal tung tơrŭm cheăng kâ pơla péa tơnêi têa, thế mơdêk tung tơrŭm tê mơdró péa pâ vâ rĕng châ 500 rơtuh dollars/hơnăm. Rôh kố, Ngế pro xiâm hnê ngăn tơnêi têa Phạm Minh Chính mơnê kơ Bulgaria hiăng kum hnê chât rơpâu ngế kăn ƀô̆, sinh viên, mâu ngế ki vâ tí tăng ‘nâi plĕng trâu tâ dêi Việt Nam, tung mê ai hên mâu kăn xiâm Việt Nam; pâ thế péa pâ tí tăng ‘nâi plĕng tung tơrŭm hnê hriâm túa ki nếo vâ tơ’mot mâu sinh viên, mâu ngế tí tăng ‘nâi plĕng tơ’nôm dêi péa tơnêi têa hriâm a mâu hngêi trung, mâu tíu hnê hriâm dêi tơrêm tơnêi têa tung mâu kơvâ cheăng pêi ki trâu tâ dêi péa pâ ai.